თავისუფალი ადამიანებისგან შემდგარი ქვეყანა მაშინ არის ძლიერი, როდესაც სახელმწიფოს აქვს ჩამოყალიბებული მმართველობის ძლიერი სისტემა. ისეთი სისტემა რომელიც გამორიცხავს გადაჭარბებულ და უკონტროლო ძალაუფლების თავმოყრას ხელისუფლების რომელიმე რგოლში, რომელიმე თანამდებობის პირის ხელში, - ამის შესახებ საქართველოს პრემიერ-მინისტრმა ბიძინა ივანიშვილმა ფილარმონიაში პარტია "ქართული ოცნება - დემოკრატიული საქართველოს" რიგგარეშე ყრილობაზე სიტყვით გამოსვლისას განაცხადა.
"ასეთ სისტემად ჩვენს პარტიას საპარლამენტო რესპუბლიკა ესახება, ძლიერი მთავრობითა და იმ აუცილებელი პირობით, რომ ძალაუფლება გადანაწილდება საკანონმდებლო, აღმასრულებელ და სასამართლო ხელისუფლების შტოებს შორის. საქართველოს დღევანდელი კონსტიტუცია შეიცავს გაუგონარ ნორმას - საქართველოს პრეზიდენტს შესაძლებლობა აქვს ისე დანიშნოს მთავრობა, რომ არ შეუთანხმოს პარლამენტს, ხალხს", - განაცხადა ივანიშვილმა და აღნიშნა, რომ მსოფლიოს არც ერთ დემოკრატიულ ქვეყანაში არ არსებობს ამის პრეცედენტი.
"არსად არ ეძლევა ერთ კაცს იმის შესაძლებლობა, რომ ერთპიროვნულად დანიშნოს მთავრობა და ამით ხალხს მოპაროს ძალაუფლება. 9 წელი გვაცხოვრეს ქვეყანაში, რომელსაც კონსტიტუციით ჰქონდა გაფორმებული დიქტატურა. ამიტომ არის საჭირო საკონსტიტუციულ ცვლილებები, რათა აღგეს ქართველი ხალხის კანონიერი უფლება და დაუბრუნდეს წართმეული ძალაუფლება", - განაცხადა პრემიერმა.
