საქართველოს პრემიერ მინისტრმა ბიძინა ივანიშვილმა ფილარმონიაში გამართულ ყრილობაზე ეროვნულ ბიბლიოთეკასთან მომხდარ ფაქტზე გაამახვილა ყურადღება და განაცხადა, რომ მას სააკაშვილისაგან უფლებააყრილი ხალხის ძალიან კარგად ესმის.
"სააკაშვილისგან უფლებააყრილი ხალხი პროტესტის გამოსახატავად შეიკრიბა. ამას მათ რა თქმა უნდა, ვერავინ დაუშლის, მაგრამ ის რაც მერე მოხდა ყოვლად დაუშვებელია. ახლავე უნდა ვისწავლოთ ის, რომ უსამართლობას კანონის ძალით უნდა გავცეთ პასუხი და არა მუშტიკრივით", _ განაცხადა ივანიშვილმა.
მისივე თქმით, თუ ადამიანებმა გადაწყვიტეს, რომ პირადად უნდა გაუსწორდნენ და ასე აგებინონ პასუხი მოძალადეს, ასე არაფერი გამოვა და ასე სახელმწიფო არ აშენდება.
"ერისა და ქვეყნის კულტურა სწორედ აქ ვლინდება. სწორედ სახელმწიფო და კანონია ის ძალა რომლის იმედიც უნდა ჰქონდეს კაცს. სახელმწიფომ, კანონმა და სასამართლომ უნდა აღადგინოს სამართლიანობა. მე გპირდებით, რომ სამართლიანობას აუცილებლად აღვადგენთ, მაგრამ ეს ცივილებულად უნდა მოხდე, ისე როგორც ეს ჩვენი დიდი კულტურის მქონე ქვეყანას ეკადრება", _ განაცხადა ივანიშვილმა.
