მიხეილ სააკაშვილმა ხელისუფლება თურქეთის ტერიტორიაზე ქართული ისტორიული ძეგლების ოშკისა და იშხნის რეაბილიტაციის პროცესის შეფერხებისთვის გააკრიტიკა. თუმცა პრეზიდენტმა აღნიშნა, რომ ის მიესალმება თურქეთის მხარესთან მიღწეულ შეთანხმებას.
,,თურქეთში გამართული მოლაპარაკების შედეგად საქართველოს მთავრობამ გამოაცხადა, რომ მათ მიიღეს გადაწყვეტილება ბათუმში მეჩეთის აღდგენისა და საქართველოს ძეგლების თაობაზე თურქეთის რესპუბლიკის ტერიტორიაზე. ჩვენ ამ საკითხზე უკვე რამდენიმე წელია ვმუშაობთ და ჩვენი პოზიცია ამ საკითხზე არის გამჭვირვალე და ნათელი. მეჩეთები საქართველოს კულტურული მემკვიდრეობის ნაწილია, ქართული კულტური ნაწილი, რადგან მუსლიმანები არიან ქართული საზოგადოების განუყოფელი ნაწილი დ ჩვენი ძეგლები თურქეთში არის ასევე ქართული კულტურის განუყოფელი ნაწილი", _განაცხადა მიხეილ სააკაშვილმა და აღნიშნა, რომ უნდა მოხდეს თურქეთის ტერიტორიაზე ქართული ისტორიული ძეგლების აღდგენა და პრეზიდენტი მიესალმება თურქეთთან ამ მიმართულებით გადადგმულ ნაბიჯებს.
მიხეილ სააკაშვილმა განმარტა, რომ ,,ის ხალხი ვინც ახლა ხელისუფლებაშია ისტერიულ წინააღმდეგობას გვიწევდა ამ საკითხის გადაჭრაში".
,,ახლა ირკვევა, რომ მათ საერთოდ არ ადარდებდათ არც ჩვენი ძეგლების ბედი და არც მეჩეთების ბედი. მე არ მინდა ბოლომდე დავიჯერო, მაგრამ როგორც ახლა გამოიყურება მთავარი იყო კომფორტული სავარძლებისთვის ბრძოლა და როგორც კი მოკალათდებიან ამ სავარძლებზე, მაშინ მათი ეს პრინციპები გადადის მეასე პლანზე, თუნდაც არასწორი", _განაცხადა პრეზიდენტმა.
შეგახსენებთ, რომ ოშკისა და იშხნის კულტურული მემკვიდრეობის ძეგლების რეაბილიტაციაში მონაწილეობას ქართველებიც მიიღებენ. როგორც მთავრობის სხდომის დაწყებამდე ჟურნალისტებთან საგარეო საქმეთა მინისტრმა განმარტა უკვე მიღწეულია შეთანხმება და ქართველი სპეციალისტები თურქეთში განლაგებულ კულტურული მემკვიდრეობის ძეგლების რეაბილიტაციაში მიიღებენ მონაწილეობას.
,,შევთანხმდით, რომ გამოყენებული არ იქნება ნაცვალგების პრინციპი. კულტურული ძეგლები რეაბილიტაციას საჭიროებს სადაც არ უნდა იყოს და ვისაც არ უნდა ეკუთნოდეს. შეთანხმება მიღწეული და და ოშკისა და იშხნის ძელების რეაბილიტაციაში მონაწილეობას ქართველებიც მიიღებენ", -განაცხადა ფანჯიკიძემ.