"მოვუწოდებ ყველა დემონსტრანტს - მე მესმის მათი გაღიზიანების, მე მესმის მათი პროტესტის მიზეზი, მაგრამ მე მათ მოვუწოდებ სიმშვიდისკენ და დაუყოვნებლივ დატოვონ ტერიტორია. წინააღმდეგ შემთხვევაში ჩვენ გამოვიყენებთ კანონით მინიჭებულ ყველა უფლებას . ყველა მოძალადე აგებს პასუხს", _ განაცხადა საქართველოს შს მინისტრმა ირაკლი ღარიბაშვილმა საჯარო ბიბლიოთეკის შენობასთან.
მისივე თქმით, მას კარგად ესმის დემონსტრანტების და მიმართავს მათ, რომ "მათი ეს ქმედებაა ჩვენი პოლიტიკური ოპონენტების წისქვილზე ასხამს წყალს".
"ჩვენ გვქონდა ინფორმაცია, რომ ქვეყნის პრეზიდენტი აპირებდა დღეს დღის 12:00 საათზე მიემართა საქართველოს მოსახლეობისათვის. ჩემი დავალებით მობილიზებული იყო აბსოლუტურად ყველა შემადგენლობა საპატრულო პოლიციის დეპარტამენტისა და ასევე ქალაქის მთავარი სამმართველოსი.
ჩვენ მაქსიმალურად შევეცადეთ უზრუნველგვეყო პრეზიდენტის უსაფრთხოება. ასევე სტუმრების უსაფრთხოება", _ განაცხადა ღარიბაშვილმა და აღნიშნა, რომ პარტია ნაციონალური მოძრაობის აქტივისტები დემონსტრანტებთან კონფლიქტში შევიდნენ.
" სამწუხაროდ მე აღმოვაჩინე, რომ ჩვენი პოლიტიკური ოპონენტების, ნაციონალური მოძრაობის აქტივისტების ნაწილი პირდაპირ შევიდა კონფლიქტში დემონსტრანტებთან და მოხდა შეხლა შემოხდა. ჩვენ ამას არ დავუშვებთ , ეს არის კანონსაწინააღმდეგო ფაქტი, ქმედება და ჩვენ სამართალდამცავები ყველაფერს გავაკეთებთ იმისათვის, რომ დავიცვათ კანონი", _ განაცხადა მინისტრმა.
მასალის გამოყენების პირობები