სასიამოვნო და მნიშვნელოვანი, - ასე აფასებს აშშ-ს ვიცე პრეზიდენტის ჯოზეფ ბაიდენის განცხადებას აფხაზეთთან და ე.წ. სამხრეთ ოსეთთან დაკავშირებით საქართველოს საგარეო საქმეთა მინისტრი მაია ფანჯიკიძე.
როგორც მიუნხენშიმყოფმა ფანჯიკიძემ განაცხადა საქართველოს აქვს ძალიან დიდი მხარდაჭერა ამერიკის შეერთებული შტატების მხრიდან.
"ეს იყო, რასაკვირველია, უაღრესად მნიშვნელოვანი განცხადება ჩვენთვის. მან ისიც აღნიშნა, რომ არავის არ აქვს უფლება ჩაერიოს იმაში, თუ ვინ გახდება რომელიმე ალიანსის წევრი. ესეც ჩვენს მიმართ გაკეთებული განცხადება იყო, რაც არის უაღრესად სასიამოვნო და მნიშვნელოვანი, იმიტომ, რომ ამას ამბობს აშშ-ს ვიცე-პრეზიდენტი და ამბობს მიუნხენის კონფერენციაზე, სადაც ეს ესმის მთელს მსოფლიოს. საქართველოს ტერიტორიული მთლიანობა და სუვერენიტეტი არის ხელშეუხებელი. მის დარღვევას არ დაეთანხმება არავინ და ეს არის მნიშვნელოვანი განცხადება ჩვენი ქვეყნისთვის", - განაცხადა ფანჯიკიძემ.
მისივე თქმით, ბაიდენის განცხადება ნიშნავს, რომ საქართველოს აქვს ძალიან დიდი მხარდაჭერა ამერიკის შეერთებული შტატების მხრიდან და ძალიან მნიშვნელოვანია, როდესაც ამაზე საუბრობს აშშ-ს ვიცე-პრეზიდენტი.
შგახსენებთ, რომ ვიცე-პრეზიდენტმა ჯოზეფ ბაიდენმა მიუნხენის უსაფრთხოების კონფერენციაზე განაცხადა, რომ აშშ- არ აღიარებს აფხაზეთსა და ე.წ. სამხრეთ ოსეთს.
"ჩვენ ვერ დავეთანხმებით რუსეთს ყველაფერში, მაგალითად, ჩვენ არ ვაღიარებთ აფხაზეთსა და სამხრეთ ოსეთს, როგორც დამოუკიდებელ სახელმწიფოებს. ჩვენ არ ვაღიარებთ არც ერთ ქვეყანას , რომელსაც აქვს გავლენის სფერო. ჩვენი პოზიცია კვლავ უცვლელია: სუვერენულ სახელმწიფოებს აქვთ უფლება, მიიღონ გადაწყვეტილებები და თავად აირჩიონ მოკავშირეები", - განაცხადა ბაიდენმა.
მისივე თქმით, საქართველო და ბალკანეთის ქვეყნები ისწრაფვიან ევროატლანტიკური ინტეგრაციისკენ.