კოალიცია "ქართული ოცნების" დაშლის არავითარი საშიშროება არ არსებობს, - ამის შესახებ ჟურნალისტებს თავდაცვის მინისტრმა ირაკლი ალასანიამ პრემიერ-მინისტრ ბიძინა ივანიშვილთან შეხვედრის შემდეგ განუცხადა. მისი თქმით, კოალიცია აგრძელებს იმ გეგმების განხორციელებას, რაც დასახული აქვს.
"ჩვენ ყველა საკითხზე გულწრფელად ვლაპარაკობთ როგორც კოალიციაში შემავალ პარტიებში, ისე მთავრობაში, მთავრობის წარმომადგენლები", - განაცხადა ალასანიამ და აღნიშნა, რომ ივანიშვილთან აბსოლუტურად ჩვეულებრივი ტიპის სამუშაო შეხვედრა გამართა, რომელზეც ბრიტანეთში ვიზიტის შედეგებთან დაკავშირებით პრემიერს ანგარიში ჩააბარა და მიმდინარე საკითხებზე ისაუბრა.