დამკვიდრდა სხვა ტენდენცია და ნაცვლად დაპირებების შესრულებისა, ყოველდღიურად პოლიტიკური ოპონენტების დევნა ხდება, - ამის შესახებ, დღეს საღამოს გამართულ საგანგებო ბრიფინგზე თბილისის მერმა გიგი უგულავამ განაცხადა და მიმართა გამოძიებას მზად არის ჩვენება მისცეს.
მისი თქმით, "თბილსერვისჯგუფის" თანამშრომლების დაკითხვა აღვირახსნილი პოლიტიკური დევნაა.
"გამოძიებას მივმართავ, ნუ დაიღლებით იმ დახუთულ ოთახებში ქალბატონების დაკითხვით. ნუ აწვალებენ ამ ხალხს. მოვიდნენ და პირდაპირ, აი, აქ ვაძლევ ჩვენებას. დიახ, ეს ადამიანები მუშაობდნენ "თბილსერვისჯგუფში" მაშინ, როდესაც ბუნკერების გაუქმება ხდებოდა, რომელმაც უამრავ თბილისელს შვება მოუტანა, ამ საკითხს კომუნიკაცია და უამრავი ადამიანი სჭირდებოდა, რომლებიც დადიოდნენ და კარდაკარ ხსნიდნენ ამ საჭიროებას. სწორედ ამ მიზნით იყო ეს ხალხი აყვანილი და ვწუხვარ, რომ ამ ხალხის დასაქმების სხვა გზა დღეს არ გამაჩნია. შევეცდები, რომ პოლიტიკური ნიშნით საჯარო სამსახურებიდან დათხოვნილ ყველა ადამიანს, რომელთა ნაცვლად "ოცნების" ისეთი აქტივისტები დასააქმეს, ვინც კლავიატურას კომპიუტერის მონიტორისგან ვერ ასხვავებს, ყველანაირად დავეხმარო", - განაცხადა უგულავამ და აღნიშნა, რომ გაუგებარია, თუ რა ნიშნით ჩაატარა დღეს ბრიფინგი საგამოძიებო სამსახურმა მაშინ, როდესაც გამოძიების ფარგლებში ბრალდებული არ არსებობს. "სასამართლოზე უნდა დაიკითხოს "თბილსერვისჯგუფის" 700 თანამშრომელი და მტყუან-მართალი სწორედ იქ გამოჩნდება. ბედნიერი ვიქნებოდი, თუ ამ ადამიანებს დავასაქმებდი. მე გავაკეთებ ყველაფერს, რომ თუ მათ ვერ დავასაქმებ, დავეხმარო მაინც", - განაცხადა გიგი უგულავამ.
"700 ადამიანის დასაქმება შევძელით და მეტს შევძლებთ. "თბილსერვისჯგუფთან" დაკავშირებული პროცესები აღვირახსნილი პოლიტიკური დევნის კლასიკური მაგალითია. რა ნიშნით არის დანიშნული ელდარ კურტანიძე პოლიციის აკადემიაში და რკინიგზაში - კოკა გუნცაძე, იგივე ლოგიკით ანალოგიური ბრალდება მათ უნდა წაუყენონ. მათი ხელფასები ათჯერ და ასჯერ აღემატება ამ ადამიანების ხელფასებს", - განაცხადა გიგი უგულავამ.
შეგახსენებთ, რომ საქართველოს ფინანსთა სამინსიტროს საგამოძიებო სამსახური, შპს „თბილსერვის ჯგუფი" - ს საქმიანობას სწავლობს, რომელიც თბილისის მერიამ ქალაქის დასუფთავების მიზნით 2006 წელს დააფუძნა. გამოძიებით დადგენილია, რომ 2009 წლის 31 დეკემბერს შპს „თბილსერვის ჯგუფის" იმჟამინდელმა გენერალურმა დირექტორმა გიორგი ხუჭუამ, მერიის დასუფთავების სამსახურის იმჟამინდელი უფროსის, ტარიელ ხიზანეიშვილის დავალებით, „ერთიანი ნაციონალური მოძრაობის" აქტივისტების მატერიალური უზრუნველყოფის მიზნით, ამ სამსახურში ფორმალურად შექმნა „საზოგადოებასთან ურთიერთობის განყოფილება", სადაც, 2 წლის განმავლობაში, ფიქტიურად დასაქმდა აღნიშნული პოლიტიკური პარტიის 764 აქტივისტი - ე.წ. პარტიული კოორდინატორი. უმეტესობას ამ სამსახურში არც ერთი დღე არ უმუშავია, რადგან ისინი, როგორც წესი, უკვე დასაქმებულები იყვნენ სხვადასხვა საბიუჯეტო ორგანიზაციებში და პრალელურად პარტიულ საქმიანობასაც ეწეოდნენ, თუმცა დედაქალაქის ბიუჯეტისთვის განკუთცნილი ასიგნებებიდან მათ ხელფასის სახით 5 245 945 ლარი დაერიცხათ.
გამოძიებით ირკვევა, რომ 2010 წლის 6 აგვისტოს, "თბილსერვის ჯგუფის" საშტატო განრიგი და სახელფასო ფონდი დედაქალაქის მოქმედმა მერმა - გიგი უგულავამ დაამტკიცა. რაც შეეხება დასუფთავების სამსახურის ყოფილ უფროსს, ტარიელ ხიზანეიშვილს, იგი ამჟამად ვიცე-მერის თანამდებობას იკავებს. გამოძიება ინტენსიურად მუშაობს 5 245 945 ლარის გაფლანგვის ფაქტზე და უახლოეს დღეეებში გადაწყვეტს ბრალეულ პირთა სისხლის სამართლის პასუხისმგებლობის საკითხს.
