ამნისტია პოლიტიკურ გადაწყვეტილება იყო, - განაცხადა ვენეციის კომისიის პრეზიდენტმა ჯანი ბუკიკიომ "შერატონ მეტეხი პალასში" გამართულ პრესკონფერენციაზე.
მისი თქმით, საქართველოს მთავრობას გაცემული აქვს დაპირებები და მათ ამ ჟესტით სურდათ დაპირებების შესრულება.
ვენეციის კომისიის პრეზიდენტმა საფრანგეთის მაგალითი გაიხსენა, სადაც, მისი თქმით, რამდენიმე წლის წინ არჩევნების შემდეგ საგზაო ჯარიმები გაუქმდა.
"მოქალაქეები დღესაც, არჩევნების წინ უკვე საგზაო მოძრაობის წესებს აღარ იცავენ. რაც შეეხება ე.წ. პოლიტპატიმრების გათავისუფლებას, ეს გამოიწვია იმან, რომ საქართველოს კანონებში ამ მხრივ გარკვეული დეფიციტია. სწორედ ამიტომ მომავალ კვირას საქართველოს ვენეციის კომისიის ექსპერტთა ტექნიკური ჯგუფი ეწვევა, რომელიც ხელისუფლებას მიაწვდის დასკვნებს, რათა მომავალში ეს ყველაფერი უკეთ წარიმართოს", - აღნიშნა ჯანი ბუკიკომ.
ვენეციის კომისიის პრეზიდენტმა ასევე წუხილი გამოთქვა იმასთან დაკავშირებით, რომ საქართველოს ხელისუფლება "ამნისტიის კანონთან" დაკავშირებით ვენეციის კომისიის რეკომენდაციას არ დაელოდა.
