საქართველოსა და ევროკავშირს შორის მოლაპარაკებების პროცესი არ შენელებულა, - ამის ევროპული საგარეო ქმედებათა სამსახურის, რუსეთის, აღმოსავლეთ პარტნიორობის, ცენტრალური აზიის, რეგიონული თანამშრომლობისა და ეუთო-ს დირექტორატის ხელმძღვანელმა, გუნარ ვიგანდიმ საგარეო საქმეთა მინისტრის პირველ მოადგილესთან, დავით ზალკალიანთან გამართულ ერთობლივ პრესკონფერენციებზე განაცხადა.
ვიგანდი თქმით, ინფორმაცია თითქოს საქართველოში ხელისუფლების ცვლილების მერე და ევროკავშირთან მოლაპარაკებების პროცესი შენელდა, სიმართლეს არ შეესაბამაბა.
"ყველაფერი ხორციელდება გეგმის მიხედვით", - განაცხადა გუნარ ვიგანდიმ.
მისივე თქმით, სულ მალე იქნება დასრულებული მოლაპარაკებების ძირითადი ნაწილი.
როგორც დავით ზალკალიანმა აღნიშნა, გაიმართა საქართველოსა და ევროკავშირს შორის ასოცირების შესახებ შეთანხმების ტექსტის შემუშავების მიზნით მოლაპარაკებების რიგით მე-13 პლენარული სესია. მისი თქმით, ტექსტის დიდი ნაწილი შეთანხმებულია.
"წინ წავიწიეთ დღევანდელ მოლაპარაკებებში და დარჩენილია რამდენიმე საკითხი, რომელზეც საჭიროა კონსულტაციები", - განაცხადა ზალკალიანმა.
მისი თქმით, საქართველოს მთავრობის მოკლევადიან პრიორიტეტს წარმოადგენს 2013 წლის ნოემბერში ვილნიუსში დაგეგმილ აღმოსავლეთ პარტნიორობის სამიტისთვის მოლაპარაკებების დასრულება ასოცირების შეთანხმებაზე, ღრმა და თავისუფალ ვაჭრობაზე და სავიზო რეჟიმის ლიბერალიზაციის პირველ ფაზაზე.