,,ბატონ ბარამიძეს ვურჩევ გაეცნოს პარლამენტის საგარეო ურთიერთობათა კომიტეტის მიერ მომზადებულ დოკუმენტს", -განაცხადა ,,ჯი-ეიჩ-ენთან" საუბარში პარლამენტის საგარეო ურთიერთობის კომიტეტის თავმჯდომარემ თედო ჯაფარიძემ გიორგი ბარამიძის განცხადების კომენტირებისას და აღნიშნა, რომ ,,ნაციონალური მოძრაობის" მიერ ინიცირებულ ნორმებს კოალიცია ,,ქართული ოცნება" დიდი ხანია მხარს უჭერს.
,,ჩვენ, რა თქმა უნდა, ,,ნაციონალური მოძრაობის" ინიციატივას განვიხილავთ, მაგრამ კოალიცია ,,ქართული ოცნება" ,,ნაციონალური მოძრაობის" ინიციატივაში გამოხატულ მოსაზრებებს უკვე კარგა ხანია მხარს უჭერს და ეს პოზიცია ჩვენს სამოქმედო პროგრამაშიც საჯაროდ გაცხადებულია", -განაცხადა სააგენტო ,,ჯი-ეიჩ-ენთან" საუბარში თედო ჯაფარიძემ და აღნიშნა, რომ საქართველო დსთ-ში დაბრუნებას არ აპირებს.
,, ხელისუფლებაში, არც პარლამენტში, არც ფრაქციებში გამორიცხულია საუბარი საქართველოს დსთ-ში დაბრუნების შესახებ. ბარამიძის ინიციატივა საინტერესოა, მაგრამ ვურჩევდი, რომ კარგად წაიკითხოს ის დოკუმენტი, რომელიც საგარეო ურთიერთობის კომიტეტმა ყველა ფრაქციას გადავუგზავნეთ. ჩვენს მიერ წარდგენილია ინტერფრაქციული დოკუმენტი, რომელიც საქართველოს საგარეო პოლიტიკურ კურსს უკავშირდება, სადაც მოუწოდებთ ყველა ფრაქციას, მათ შორის საპარლამენტო უმცირესობას მოხდეს შეთანხმება ქვეყნის საგარეო პოლიტიკურ კურსთან დაკავშირებით", -განაცხადა ჯაფარიძემ და აღნიშნა, რომ საქართველოს საგარეო პოლიტიკური კურსის პრიორიტეტი ნატოსა და ევროკავშირში ინტეგრაციაა.
,,ჩვენი კომიტეტის ინიციატივასთან დაკავშირებით, ვაპირებთ საგაზაფხულო სესიებთან დაკავშირებით დავიწყოთ კომიტეტებში დებატები, დისკუსიები და შემდეგ უკვე სესიაზე გადაწყდება რა ფორმა უნდა მივცეთ საგრეო ურთიერთობათა კომიტეტის ინიციატივას. პრინციპში ვეთანხმები ბატონ ბარამიძის მოსაზრებებს, მაგრამ ვურჩევდი ჯერ განვიხილოთ ჩვენს მიერ ინიცირებული დოკუმენტი და გამორიცხული არ არის მასში შევიტანოთ ზოგიერთი ის დებულება, რომელიც ,,ნაციონალური მოძრაობის" კანონპროექტშია ინიცირებული", _განაცხადა თედო ჯაფარიძემ.
შეგახსენებთ, რომ ,,ნაციონალური მოძრაობა" ახალი ინიციატივით გამოდის. როგორც პარტიის ოფისში გამართულ პრესკონფერენციაზე ,,ნაციონალური მოძრაობის" წევრმა გიორგი ბარამიძემ განაცხადა ინიციატივა საქართველოს კურსის უცვლელობას უკავშირდება.
,,ჩვენ გვინდა გამოვიდეთ ინიციატივით ,,ერთიანი ნაციონალური მოძრაობისა" და საპარლამენტო უმცირესობის სახელით და წარმოგიდგინოთ კანონპროექტი ,,საქართველოს კურსის უცვლელობის შესახებ". ეს ეხება საქართველოს სტრატეგიულ საკითხებში კურსის უცვლელობას, რომელიც სამი კომპონენტისგან შედგება: პირველი კომპონენტი ეს არის, ჩვენი კურსის უცვლელობა ნატოსა და ევროკავშირში გაწევრიანებასთან დაკავშირებით, რომ საქართველოს არცერთმა მთავრობამ ამ კურსს არ გადაუხვიოს, მეორე კომპონენტი ეს არის საქართველოს დეოკუპაციისკენ მიმართული პოლიტიკა და საქართველოს ოკუპირებული ტერიტორიების არაღიარების პოლიტიკა და მესამე, რომ საქართველო არ გაწევრიანდება დსთ-ში, ევრაზიულ კავშირში, არ გაწევრიანდება ე.წ. კოლექტიური უსაფრთხოების ხელშეკრულების ორგანიზაციაში, საბაჟო კავშირში და სხვა პოსტსაბჭოთა გაერთიანებებში", _განაცხადა ბარამიძემ და აღნიშნა, რომ კანონპროექტის ინიცირება პარლამენტში საგაზაფხულო სესიის დაწყებისთანავე მოხდება.
