პოლონეთში ოფიციალური ვიზიტის ფარგლებში საქართველოს საგარეო საქმეთა მინისტრი ეუთო-ს დემოკრატიული ინსტიტუტებისა და ადამიანის უფლებათა დაცვის ოფისის ხელმძღვანელს იანეზ ლენარჩიჩს შეხვდა. როგორც შეხვედრის დასრულების შემდეგ მაია ფანჯიკიძემ განაცხადა ODIHR-ის ხელმძღვანელთან სამი ძირითადი საკითხი განიხილეს: „ვისაუბრეთ საქართველოში დაგეგმილ საპრეზიდენტო არჩევნებზე, იმისათვის, რომ დამკვირვებლებმა დროულად დაიწყონ მომზადება და ჩამოვიდნენ, საჭიროა ზუსტად ვიცოდეთ საპრეზიდენტო არჩევნების თარიღი. მეორე საკითხი, რომელიც განვიხილეთ ეხებოდა თბილისში, მარტში დაგეგმილ კონფერენციას, რომელიც პოლიტიკაში ქალების მონაწილეობას და ქალების მონაწილეობის გათვალისწინებით პარტიების დაფინანსების სისტემას ეხება. ასევე ვისაუბრეთ იმ სადამკვირვებლო ჯგუფის საკითხზე, რომელიც საქართველოში უნდა ჩამოვიდეს მთავრობის მოწვევით. საქართველოს პრემიერ-მინისტრმა ჯერ კიდევ ნოემბერში დაპატიჟა ყველა საერთაშორისო ორგანიზაციიდან ჯგუფები, რათა ჩამოვიდნენ და ადგილზე ადევნონ თვალყური საქართველოში მიმდინარე პროცესებს. ეს ჯერჯერობით შესადგენი პროექტია, რომელზეც იმუშავებენ, მოგვაწვდიან ინფორმაციას და ამ მიმართულებითაც იგეგმება აღნიშნულ ორგანიზაციასთან თანამშრომლობა"- განაცხადა საგარეო საქმეტა მინისტრმა.
ODIHR-ის ხელმძღვანელის განცხადებით ორგანიზაცია მზად არის საქართველოს მთავრობას დახმარება გაუწიოს დემოკრატიული რეფორმების გატარების საკითხში. ლენარჩიჩის თქმით, მსგავსი თანამშრომლობა აუცილოებელია და ხელს უწყობს საქართველოში რეფორმების წარმატებით გაგრძელებას.
