სოლოლაკში, მთაწმინდის კალთებთან "პოეზიის სასახლის" - "არტისტული ყვავილების", სამი თეთრი თაიგულის ფორმის, უნიკალურ შენობა-მემორიალს ანგრევენ.
"ეს შენობა მსოფლიოში გამოირჩევა განსხვავებული არქიტექტურით და მშენებლობის ტექნოლოგიით (იგი ადგილზე დაძერწა ავტორმა). ჯერ კიდევ დაუმთავრებელმა „პოეზიის სასახლემ" უკვე მოასწრო სამი საერთაშორისო ჯილდოსაღება. მათ შორის, 2006 წ. მიიღო არქიტექტურის საერთაშორისო ტრიენალეს ვერცხლის მედალი და პრემია „მაღალი ხუროთმოძღვრული ოსტატობისათვის". ამ უნიკალური შენობის ავტორია, ცნობილი არქიტექტორი, სახელმწიფო პრემიის ლაურიატი, არქიტექტურის საერთაშორისო აკადემიებისა (ქ.ქ. სოფია, მოსკოვი, ბაქო) და საქართველოს ტექნიკური უნივერსიტეტის პროფესორი შოთა ბოსტანაშვილი", - განუცხადა "ჯი-ეიჩ-ენს" ისტორიკოსმა ჰენრი კუპრაშვილმა.
როგორც კუპრაშვილმა განმარტა, პოეზიის სასახლის მშენებლობა 1999 წელს დაიწყო. 2002 წელს შენობის არქიტექტურული სახე დასრულებული იყო. დარჩენილი იყო შიდა სამუშაოების ჩატარება.
"2012 წლის ბოლოს პოეზიის სასახლემ შეიცვალა მლობელი. იგი შეიძინა "NGS group"-მა. ახალი მფლობელს, როლისთვისაც ხელოვნება და არქიტექტურა უფრო ნაკლებ ფასეულობას წარმოადგენს ვიდრე პოეზიის სასახლის ადგილას მის მიერ დაგეგმილი, დიდი ფულის მომტანი მრავალსართულიანი ე.წ. "ელიტური" სახლის მშენებლობა. ლოგინს მიჯაჭვული „პოეზიის სასახლის" ავტორი, რაკი მას არ ჰყავს გავლენიან „ქართულ ელიტაში" მფარველები, უმწეოდ შესცქერის თუ როგორ ანადგურებენ „ძლიერი", გავლენიანი და ფულიანი ვანდალები მის ქმნილებას, ქართულ არქიტექტურულ და კულტურულ ძეგლს ... ეს შეიძლება მოხდეს ქვეყანაში, სადაც ჯაყო-ყვარყვარეები და მათი მენტალიტეტი ბატონობს ... ", - განაცხადა კუპრაშვილმა.
როგორც ირკვევა, 2012 წლის ბოლოს პოეზიის სასახლემ შეიცვალა მლობელი. თბილისის არქიტექტურის სამსახურის საიტის მიხედვით მისი მფლობელი გახდა "NGS group". 2013 წლის 8 იანვარს შეტანილი განცხადების (ნომერი: AR1101780) მიხედვით მფლობელი ითხოვს პოეზიის სასახლის დანგრევას. განაცხადის შემტანი არის სუპერმარკეტების ქსელ ფრესკოს (fresco) დირექტორი. ახალი მფლობელს დაგეგმილი აქვს პოეზიის სასახლის ადგილას მრავალსართულიანი ე.წ. "ელიტური" სახლის მშენებლობა.
დემონტაჟის პროექტის ავტორი (მის პოზიციას ახალი მფლობელიც იზიარებს) პოეზიის სასახლის დანგრევას "პატრიოტულ მოვალეობად" მიიჩნევს, რასაც "მერიის არქიტექტურის სამსახურმა ხელიც უნდა შეუწყოს".
ამ დოკუმენტში პოეზიის სასახლე მოიხსენიება როგორც რესტორანი და აღწერილია მხოლოდ მისი სამშენებლო-კონსტრუქციული ელემენტები. არაფერია ნათქვამი უნიკალურ ნაძერწზე და დასრულებული გვერდითი ფასადის შესახებ.
ჯერ-ჯერობით ახალ მფლობელებს არ მიუღიათ ნებართვა სადემონტაჟო სამუშაოების დასაწყებად. მიუხედავად ამისა 17 იანვრისთვის გვერდითი ფასადის ქვის დახვეწილი მოპირკეთება ჩამოხსნილია.