"მე მინდა, გითხრათ, რომ არანაირი მსგავსი გეგმები მთავრობის დათხოვნის და მით უმეტეს, პარლამენტისა, არ გამაჩნია. მთელი ეს ლაპარაკი, რომ რაღაცა შეთქმულება ჩაშალეს, მიყურებთ და გეუბნებით, რომ არც რაიმე მზაკვრული გეგმა მაქვს და არც მქონია. მე ყველანაირი უფლება მქონდა, შემეძლო მათთვის მთავრობა არ მიმეცა და 6 თვით მაინც დამეკომპლექტებინა ის, შემეძლო მათთვის მიმეცა უფლება დაეკომპლექტებინათ, მაგრამ არ მიმეცა უფლება დაენიშნათ ღარიბაშვილი, წულუკიანი, ალასანია და კბილაშვილი. ამ ყველაფრის უფლება მივეცი, იმიტომ, რომ მერე არ ჰქონოდათ სათქმელი ხელი შეგვიშალაო. მე ძალიან კარგად ვიცოდი, რომ როცა ფუნთუშას ჰპირდები და ფუნთუშა არ გაქვს, მაშინ უნდა ახსნა რატომ არ გაქვს, მერე დაიწყება ახსნები, რომ ფუნთუშა მოჰქონდათ და გზაში ვიღაცა დახვდათ და ა.შ. ეს რომ არ ეთქვათ, გავეცალეთ გზიდან და ვუთხარით, მოიტანეთ ფუნთუშა და მიეცით ხალხს. ეს იყო ჩემი "მზაკვრული გეგმა" თავიდანვე, რომ თუ შესაძლებელია იმ ყველაფრის შესრულება, რასაც ლაპარაკობდნენ, ხალხმა თავად ნახოს. ახლა, აი, ამ პირობებში რატომ უნდა მქონდეს სურვილი ვინმეს დათხოვნის, რომ მერე თქვან, რომ ამ კაცს უნდოდა ხელისშეშლა ჩვენთვის, ნამდვილად არ მაქვს ამის სურვილი, ძალიან მინდა, გააკეთონ ყველაფერი, რასაც მოსახლეობას დაჰპირდნენ. ამის ვერანაირ წინაპირობას ვერ ვხედავ, მაგრამ მაინც. ნუ ეძებენ ბნელ ოთახში კატას, რადგან ბნელ ოთახში კატა არ არის. ჩვენ მთავრობის ყველა კონსტრუქციულ ნაბიჯს მხარს დავუჭერთ, მაგრამ როცა იტყვიან, რომ რკინიგზაზე რუსეთის დიდი გეგმა უნდა შევასრულოთ, ამას ვერ დავეთანხმები. ჩემი ფუნქცია არ არის მთავრობის ჩაფლავება და არავის ვათქმევინებ, რომ რაიმეში ხელი შევუშალე. ამ საკონსტიტუციო ცვლილებებით ისინი ანგრევენ დაკეტილ კარს და ეს რაში სჭირდებათ არ მესმის", - განაცხადა სააკაშვილმა