დავით ოქიტაშვილის განცხადება არის საზოგადოებრივი აზრის მომზადება ამ ორი ადამიანის დასაკავებლად, ვგულისხმობ მამუკა მდინარაძეს და თინათინ რუხაძეს, ვინც მართლა კორუმპირებულია,- ამის შესახებ „კოალიცია ცვლილების“ ერთ-ერთმა ლიდერმა, ნიკა გვარამიამ ჟურნალისტებს განუცხადა.
გვარამია ვარაუდობს, რომ იქნება სხვა დაჭერებიც, მათ შორის უახლოეს მომავალში.
„დავით ოქიტაშვილი შეიძლება ასე ფიქრობს მართლა, მაგრამ დარწმუნებული ვარ, მისი განცხადებები რომ ნებადართული არ იყოს ბიძინა ივანიშვილის მხრიდან და მეტიც, დაკვეთილი არ იყოს ბიძინა ივანიშვილის მხრიდან, ეს განცხადებები არ იარსებებდა. ეს არის პროცესის გახსნა, საზოგადოებრივი აზრის მომზადება იმისთვის, რომ ეს ხალხი დაიჭირონ. მე საერთოდ არ მაინტერესებს მათი შიდა გარჩევები, ნამდვილად მჯერა, რომ ეს ორი ადამიანი კორუმპირებულია, მაგრამ მათზე უფრო კორუმპირებული ივანიშვილი რომ დაიჭერს, ჩემთვის ამით არაფერი შეიცვლება. უნდა წავიდეს ყველა. ჩვენი აქციის მთავარ სლოგანს შეგახსენებთ - "საქართველო ივანიშვილის გარეშე". ეს ავტომატურად გულისხმობს რუხაძის , მდინარაძის, კობახიძის და ყველა დანარჩენის გარეშე, მათი სახელია „ლეგიონი”,- განაცხადა ნიკა გვარამიამ.
მისი თქმით, სუს-ის ყოფილი უფროსის მამუკა მდინარაძის და კულტურის ყოფილი მინისტრის თინათინ რუხაძის „კორუმპირებულობაში ორი აზრი არ არსებობს".
„ამაში ორი აზრი არ არსებობს და იხილეთ არამხოლოდ პატრიარქის დაკრძალვიდან მოპარული ფული, არამედ ბევრად უფრო მეტი, რომელიც მოიპარეს მაგალითად, ტელეკომპანია „რუსთავი 2”-ის ე.წ. მეგა პროექტების მეშვეობით. ცხადია, ამას ოქიტაშვილი დაკვეთით აკეთებს. ასევე შეგახსენებთ, რომ მარტო ოქიტაშვილი არ არის. ეს არის "ქართული ოცნების" ყველა მოლაპარაკე თავი, შეიძლება ასე ითქვას - ყველა მათი "ტროლი", რეალური ადამიანები, რომლებიც "ტროლებად" მუშაობენ“,- განაცხადა გვარამიამ.
შეგახსენებთ, “კულტურის პალატის“ ხელმძღვანელმა დავით ოქიტაშვილმა სამართალდამცავ უწყებებს კულტურის ყოფილი მინისტრის თინათინ რუხაძეს საქმიანობის შესწავლისკენ მოუწოდა.
დავით ოქიტაშვილი თინათინ რუხაძეს მისი საქმიანობის მიზანმიმართულ შეზღუდვაში, ასევე, მისი პერსონის რეპუტაციის შელახვაში ადანაშაულებს.
