საქართველოს პრეზიდენტი მიხეილ სააკაშვილი დღეს პიანისტ ბექა გოჩიაშვილს ტელეფონით პირადად ესაუბრა. პრეზიდენტის ადმინისტრაციის ინფორმაციით, დღესვე სააკაშვილი მუსიკოსის მამას ვალერი გოჩიაშვილს შეხვდა და იმ ზეწოლის ფაქტებით დაინტერესდა, რომელიც ბექა გოჩიაშვილისა და მისი ძმის, ლაშა გოჩიაშვილის წინააღმდეგ ვაკე-საბურთალოს პოლიციის თანამშრომლების მიერ დაკითხვის პროცესში ხორციელდებოდა. ქვეყნის პირველმა პირმა მოზარდს სოლიდარობა კიდევ ერთხელ გამოუცხადა და აღნიშნა, რომ დამნაშავეები აუცილებლად უნდა დაისაჯონ.
სატელეფონო საუბრისას მიხეილ სააკაშვილმა პიანისტს სწავლაში წინსვლა და პროფესიული წარმატებები უსურვა.
შეგახსენებთ, რომ ბექა გოჩიაშვილი და მისი ძმა ვაკე-საბურთალოს პოლიციის სამმართველოს თანამშრომლებმა მეზობლის ბინის გაქურდვის ფაქტზე 8 იანვარს მოწმის სტატუსით დაკითხვაზე დაიბარეს.
როგორც 16 წლის მუსიკოსი აცხადებს, გამომძიებლების მხრიდან მის მიმართ ფსიქოლოგიური ზეწოლა მიმდინარეობდა, მის ძმას კი სიტყვიერი შეურაცხყოფა მიაყენეს.
