მთავრობის კანცელარიაში ალექსი პეტრიაშვილი ევროპულ და ევროატლანტიკურ სტრუქტურებში ინტეგრაციის საკითხებში საქართველოს სახელმწიფო მინისტრის რანგში საქართველოს ევროკავშირში ინტეგრაციის საკითხებზე საზოგადოებრივ მრჩეველთა საბჭოს განახლებულ შემადგენლობას პირველად შეხვდა. მრჩეველთა საბჭოს მუშაობაში არასამთავრობო ორგანიზაციების, აკადემიური წრეების, მედიის წარმომადგენლები და დამოუკიდებელი ექსპერტები მონაწილეობენ.
შეხვედრა დისკუსიის რეჟიმში წარიმართა. საუბრის მთავარი თემები ევროკავშირთან ასოცირებისა და თავისუფალი ვაჭრობის შესახებ შეთანხმებების მოლაპარაკებების მიმდინარეობა, სავიზო რეჟიმის ლიბერალიზაცია, აღმოსავლეთ პარტნიორობის ფარგლებში თანამშრომლობის საკითხები იყო. მრჩეველთა საბჭოს სხდომაზე ევროკავშირში ინტეგრაციის თემაზე საზოგადოების ინფორმირებულობის გაზრდისა და ამ პროცესში არასამთავრობო სექტორის მაქსიმალურად ჩართულობის საკითხზეც იმსჯელეს.
„ჩვენ ძალიან დიდ მნიშვნელობას ვანიჭებთ არასამთავრობო ორგანიზაციებთან, სამოქალაქო საზოგადოებასთან მჭიდრო თანამშრომლობას, ვინაიდან მათი რჩევები, მათი რეკომენდაციები ძალიან ღირებულია ჩვენთვის"- განცხადა ალექსი პეტრიაშვილმა და იმედი გამოთქვა, რომ მსგავსი შეხვედრები მომავალშიც ინტენსიურად გაიმართება. „ევროკავშირი ძალიან დიდ მნიშვნელობას ანიჭებს სამოქალაქო სექტორის როლის გაძლიერებას საქართველოსა და ევროკავშირს შორის ურთიერთობების კუთხით"- აღნიშნა სახელმწიფო მინისტრმა.
შეგახსენებთ, რომ საქართველოს ევროკავშირში ინტეგრაციის საკითხებზე საზოგადოებრივ მრჩეველთა საბჭო 2005 წელს შეიქმნა. საზოგადოებასთან აქტიური დიალოგის მიზნით, შეხვედრები პერიოდულად იმართება, სადაც საქართველოს ევროკავშირში ინტეგრაციის პრიორიტეტული და აქტუალური საკითხები განიხილება.
