საპარლამენტო უმრავლესობის წევრი კობა დავითაშვილი აცხადებს, რომ თუ პრეზიდენტი "საერთო სასამართლოების შესახებ" კანონპროექტს ვეტოს დაადებს, ადექვატურ პასუხს მიიღებს. მისი თქმით, ამ კანონით სასამართლო ხდება დამოუკიდებელი.
"ეს აწუხებს ბატონ სააკაშვილს. მას არ სურს დამოუკიდებელი სასამართლო და ის გვექმურება ვეტოს გამოყენებით. ჩვენი პასუხი არის ძალიან მარტივი - თუ ბატონი სააკაშვილი თავს ანებებს კოჰაბიტაციის პროცესს და გადადის ღია კონფრონტაციაზე ქართულ ოცნებასთან, ჩვენი პასუხი იქნება ადეკვატური - თუ ის გამოიყვანს 200 კაცს ქუჩაში, ჩვენ გამოვიყვანთ 200 ათასს. თუ ის ვეტოს დაადებს ამ კანონს, ჩვენ დავძლევთ ამ ვეტოს", - განაცხადა დავითაშვილმა.
შეგახსენებთ, რომ საქართველოს პრეზიდენტმა მიხეილ სააკაშვილმა გუშინ გამართულ საგანგებო ბრიფინგზე განაცხადა, რომ "საერთო სასამართლოების შესახებ" კანონპროექტს ვეტოს დაადებს თუ იმ ფორმით დამტკიცდება, რა ფორმითაც ახლაა. მისი თქმით, კანონოპროექტის მირების შემთხვევაში სასამართლო ინსტიტუტი მთლიანად აღმოჩნდება დამოუკიდებლობის გარეშე.
"იუსტიციის საბჭო და სასამართლო ხელისუფლება მთლიანად მოექცევა აღმასრულებელი ხელისუფლების კონტროლის ქვეშ, უკვე ფორმალურადაც. საუბარია იმაზე, რომ რომც მოინდომონ მოსამართლეებმა წინააღმდეგობის გაწევა პროკურატურისადმი, პრემიერ-მინისტრისადმი, იუსტიციის სამინისტროსადმი, ამის ფორმალური საშუალებაც აღარ ექნებათ", - განაცხადა პრეზიდენტმა.
პარლამენტმა, პირველი მოსმენით - პრინციპების დონეზე, სასამართლოებთან დაკავშირებით იუსტიციის სამინისტროს მიერ შეთავაზებული საკანონმდებლო პაკეტი დაამტკიცა. ცვლილებები "საერთო სასამართლოების შესახებ", "საერთო სასამართლოების მოსამართლეთა დისციპლინარული სამართალწარმოების შესახებ", "იუსტიციის უმაღლესი საბჭოს შესახებ" კანონებში და "სისხლის სამართლის საპროცესო კოდექსში" აისახება.