დღეს, მთავრობის კანცელარიაში ალექსი პეტრიაშვილმა ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრის რანგში საქართველოში საფრანგეთის რესპუბლიკის ელჩ რენო სალენსსა და საფრანგეთის საგარეო საქმეთა სამინისტროს ცენტრალური აზიისა და კავკასიის დეპარტამენტის დირექტორის მოადგილე ფრანსუა დელაჰუსთან გაცნობითი შეხვედრა გამართა.
შეხვედრაზე საუბარი შეეხო საქართველოსა და საფრანგეთის რესპუბლიკას შორის ორმხრივი ურთიერთობების გაღრმავების საკითხებს.
სახელმწიფო მინისტრმა კიდევ ერთხელ დაადასტურა საქართველოს ახალი ხელისუფლების ურყევი საგარეო პოლიტიკური კურსი ნატო-სა და ევროკავშირში ინტეგრაციის მიმართულებით. ასევე საუბარი შეეხო ბრიუსელში ნატოს შტაბ-ბინაში გამართულ საგარეო საქმეთა მინისტერიალსა და ნატო-საქართველოს კომისიის სხდომის შედეგებს.
ფრანგული მხარე დაინტერესდა საქართველოს პრემიერ-მინისტრის მიერ რუსეთში სპეციალური წარმომადგენლის დანიშვნის შემდეგ რუსეთ-საქართველოს ურთიერთობების დინამიკით. სახელმწიფო მინისტრმა აღნიშნა, რომ საქართველოს ხელისუფლების ნაბიჯებს რუსეთის მხრიდან ადექვატური რეაქცია ჯერჯერობით არ მოყოლია. ამასთანავე, რუსეთის მიერ კვლავ შეუსრულებელია საფრანგეთის რესპუბლიკის (როგორც ევროკავშირის მაშინდელი პრეზიდენტი ქვეყნის) შუამავლობით 2008 წელს დადებული ცეცხლის შეწყვეტის შესახებ შეთანხმებით ნაკისრი ვალდებულებები.
შეხვედრისას ასევე, განხილულ იქნა საქართველოში მიმდინარე პოლიტიკურ პროცესები, მათ შორის ყოფილი მაღალ ჩინოსნების დაკავების ფაქტები. სახელმწიფო მინისტრმა აღნიშნა, რომ ეს პროცესი გამჭვირვალედ, კანონის სრული დაცვით მიმდინარეობს და რომელიმე პირის მიმართ შერჩევითი სამართლის გამოყენების საფრთხე არ არსებობს.
