ჟენევის საერთაშორისო მოლაპარაკებათა მორიგ რაუნდთან დაკავშირებით რუსეთის ფედერაციის საგარეო საქმეთა სამინისტრო განცხადებას ავრცელებს. განცხადებაში ნათქვამია, რომ რუსული მხარე იმედს იტოვებს, რომ იქნება კონსტრუქციული დისკუსია ძალის გამოუყენებლობისა და უსაფრთხოების გარანტიების დოკუმენტების პროექტებზე.
განცხადებაში რუსული მხარე გალში ინციდენტების პრევენციისა და მათზე რეაგირების სამუშაო ჯგუფის შეხვედრების განახლების გზის მოძიებაზედაც საუბრობს.
"სავარაუდოდ, გაგრძელდება მუშაობა რეგიონში ჰუმანიტარული სიტუაციისა და უსაფრთხოების გაუმჯობესების მიზნით. რუსული მხარე ელის კონსტრუქციულ დისკუსიებს ძალის გამოუყენებლობისა და უსაფრთხოების გარანტიების დოკუმენტების პროექტებთან დაკავშირებით", - ნათქვამია განცხადებაში და იქვე აღნიშნულია, რომ რუსული მხარე იმედოვნებს, რომ ნაპოვნი იქნება ყველასათვის მისაღები გზა, რომელიც "ქართულ-აფხაზურ საზღვარზე" ინციდენტების პრევენციისა და მათზე რეაგირების მექანიზმის შეხვედრების აღდგენას შეუწყობს ხელს.
შეგახსენებთ, რომ ჟენევის საერთაშორისო მოლაპარაკებების მორიგი, 22-ე რაუნდი 11-12 დეკემბერს გაიმართება და რუსულ დელეგაციას მოლაპარაკებებზე რუსეთის საგარეო საქმეთა მინისტრის მოადგილე გრიგორი კარასინი უხელმძღვანელებს.
