მოძრაობა "ჩვენი ხმა გიგი უგულავას" 2012 წლის 25 ნოემბერს ტელეკომპანია "მე-9 არხზე" გადაცემა "ანატომიაში" გასულ სიუჟეტს ეხმიანება და აცხადებს, რომ სიუჟეტში გასული ფაქტები, რომლებიც უგულავასთან არის დაკავშირებული, არ შეესაბამება სიმართლეს და ეს ყველაფერი მიმართულია მისი პოლიტიკური დისკრედიტაციისკენ.
"მიგვაჩნია, რომ აღნიშნული პიარაქციის ძირითადი დანიშნულება საზოგადოებაში უგულავას მიმართ მიზანმიმართული ურაყოფითი საზოგადოებრივი აზრის შექმნაა, რაც შემდგომი კომპრომეტაციის გაღრმავების საფუძველი შეიძლება გახდეს. გიგი უგულავა საქართველოს უახლესს ისტორიაში პირველად დემოკრატიული გზით ჩატარებული არჩევნების (ე.ი. დედაქალაქის მკვიდრთა) შედეგად გახდა ქალაქის მერი. უმადურობაა, არ ისაუბრო სიკეთეებზე, რაც დედაქალაქში გიგი უგულავას პირადი ინიციატივით და მონაწილეობით განხორციელდა და თბილისი მსოფლიოს განვითარებული სახელმწიფოების დედაქალაქებს მიუახლოვა", - ნათქვამია განცხადებაში.
განცხადებაში აღნიშნულია, რომ უგულავას შეფასებისას საჭიროა "გავიხსენოთ დედაქალაქის წარსული და აწყმო, სიბნელე და სინათლე, სიბინძურე და სისუფთავე, კრიმინალური ვითარების მაღალი დონე და კრიმინალის მინიმუმამდე შემცირება, სამშობლოს დაკარგული ტერიტორიებისთვის ბრძოლაში მისი აქტიური მონაწილეობა".
