საქართველოს პრეზიდენტი მიხეილ სააკაშვილი აცხადებს, რომ 8-მილიარდიანი სახელმწიფო ბიუჯეტი "მდიდარ ბიძას კი არ გამოუგზავნია", არამედ მისი მთავრობის მუშაობის შედეგია.
"ახლა ბევრს ლაპარაკობენ, ბიუჯეტი შეჭამეს, ყველაფერი წაიღესო. მე რომ პრეზიდენტი გავხდი, ბიუჯეტი იყო სულ 500 მილიონი ლარი, ახლა თითქმის 8 მილიარდამდეა. თუ შევჭამეთ და სახლში წავიღეთ, ეს ფული საიდან გაჩნდა?! თუ ვინმეს ჰგონიათ, რომ მართლა მდიდარმა ბიძამ გამოგვიგზავნა ან ვინმე მილიარდერმა მოგვცა - ნურას უკაცრავად, ესაა გადასახადების აკრეფით, კორუფციის შემცირებით მიღებული ფული", - განაცხადა სააკაშვილმა ახალგაზრდული პარლამენტის წევრებთან შეხვედრაზე.
მისი განმარტებით, ყოფილი მთავრობის წევრებს სახელმწიფოს ხარჯზე პირადი ცხოვრება არ მოუწყვიათ და ამას ქვეყნის მასშტაბით აშენებული ათეულობით შენობებიც ადასტურებს.
"შენობები, რომლებსაც ახლა დანგრევას უპირებენ, იმაზე მეტყველებს, რომ ჩემი მთავრობის წევრებს პირადი ცხოვრება არ მოუწყვიათ, როგორც ეს აბსოლუტურ უმრავლესობას წარმოუდგენია. როდესაც პირდაპირი მუქარები წამოვიდა მათზე, მათ შორის იმათზე, ვინც ახლა დაპატიმრებულია, იყო საუბარი და ზოგიერთი ეუბნებოდა, რომ უცხოეთში წასულიყვნენ. თქვეს, რით წავიდეთ, ჩვენ არ გვაქვს ფულიო. ვინც წავიდა, არც იმათ აქვთ ბევრი ფული", - აღნიშნა პრეზიდენტმა.