"ნაციონალური მოძრაობის" ერთ_ერთი ლიდერი ნუგზარ წიკლაური თავდაცვის ყოფილ მინისტრსა და ხელისუფლებას შორის გარიგებას არ გამორიცხავს. როგორც ,,ჯი-ეიჩ-ენთან" საუბარში ნუგზარ წიკლაურმა განაცხადა პირველი ოქტომბრის შემდეგ ირაკლი ოქრუაშვილის დაბრუნება შესაძლებელი იყო.
,,ირაკლი ოქრუაშვილის საქართველოში დაბრუნება პირველი ოქტობრის არჩევნების შემდეგ მოსალოდნელი იყო განსაკუთრებით მას შემდეგ, რაც პარლამენტმა აქტიური განხილვები დაიწო სხვადასხვა პირებისთვის პოლიტპატიმრის სტატუსის მინიჭების შესახებ", - განაცხადა წიკლაური, რომელიც ხელისუფლებასა და თავდაცვის ყოფილ მინისტრს შორის გარიგებას არ გამორიცხავს.
,,ვფიქრობ, ირაკლი ოქრუაშვილთან წინასწარი მოლაპარაკებები სავარაუდოდ, მის საქართველოში დაბრუნებამდე მიმდინარეობდა და კონსულტაციები ხელისუფლებასთან მომავალშიც გაგრძელდება. იმ შემთხვევაში, თუ ირაკლი ოქრუაშვილი ხელისუფლებასთან დაიწყებს თანამშრომლობას და ყოფილი თანამებრძოლების წინააღმდეგ ქმედებების განხორციელებასა და ჩვენებების მიცემას დაიწყებს, ბუნებრივია, ამ შემთხვევაში უნდა ვიფიქროთ, რომ ირაკლი ოქრუაშვილის საპატიმრო დაწესებულებიდან გამოშვება მალე მოხდება", _ განაცხადა სააგენტო ,,ჯი-ეიჩ-ენთან" საუბარში წიკლაურმა, რომელმაც აღნიშნა, რომ ხელისუფლებისთვის პრიორიტეტულია არა ადამიანის მიერ ჩადენილი დანაშული, არამედ ბრალდებული ითანამშრომლობს, თუ არა გამოძიებასთან და იქნება მათი პოლიტიკური მოკავშირე. თუმცა ,,ნაციონალური მოძრაობის" ერთ-ერთი ლიდერი არ გამორიცხავს, რომ მოლაპარაკებები ირაკლი ოქრუაშვილსა და ხელისუფლებას შორის წარუმატებლად დასრულდეს. როგორც ,,ჯი-ეიჩ-ენთან" საუბარში ნუგზარ წიკლაურმა განაცხადა წარუმატებლობის მიზეზი შეიძლება გახდეს ის, რომ ,,ირაკლი ოქრუაშვილმა თავისი პოლიტიკური ძალა ჩამოაყალიბოს".
,,კალანდაძის, ,,საზოგადოებრივ მაუწყებელთან" დაკავშირებით ხელისუფლების მხრიდან ადგილი ჰქონდა მუქარანარევ პოლიტიკურ შეთავაზებებს, რომ დაეთმოთ ადამიანებს სხვადასხვა პოზიცია და როდესაც ეს არ ხდებოდა ხელისუფლებას ჰქონდა უმარტივესი ბერკეტი ამა, თუ იმ პირისა, თუ უწყების განეიტრალება მოეხდინათ შეთითხნილი, შეკერილი საქმეებით. ირაკლი ოქრუაშვილის შემთხვევაში, რომელსაც ბრალი სამი მუხლით აქვს წაყენებული მასაც მიუთითებენ როგორი პოზიცია უნდა დაიკავოს. იმ შემთხვევაში, თუ შეთანხმება ვერ შედგა უნდა ველოდეთ, რომ ირაკლი ოქრუაშვილს ციხეში ყოფნა მოუწევს", - განაცხადა ნუგზარ წიკლაურმა.
წიკლაურის განცხადებით, ხელისუფლების მიზანია შეინარჩუნოს ერთპიროვნული მმართველობა და ტოტალური კონტროლი.
,,ამ ხელისუფლებას არ ეტყობა არანაირი ნიშანწყალი იმისა, რომ დამოუკიდებელი პოლიტიკური ჯგუფების, დამოუკიდებელი პოლიტიკური ფიგურირების გამრავლებას შეუწყოს ხელი", _ განაცხადა ,,ჯი-ეიჩ-ენთან" საუბარში ნუგზარ წიკლაურმა.
შეგახსენებთ, რომ სამართალდამცავებმა საქართველოში დაბრუნებული ირაკლი ოქრუაშვილი დააკავეს და ის გლდანის სასჯელაღსრულების დაწესებულებაში გადაიყვანეს.