"საპარტნიორო ფონდში" ახალმა მენეჯმენტმა, მისვლიდან ორი კვირის შემდეგ, ცვლილებების პირველი ეტაპი დაასრულა. სტრუქტურული რეორგანიზაციის შედეგად განისაზღვრა ფონდის აღმასრულებელი დირექტორის მოადგილეთა ახალი საშტატო განრიგი. აღმასრულებელ დირექტორს ამიერიდან 6-ის ნაცვლად 2 მოადგილე ეყოლება.
ფონდში ამოქმედდება საინვესტიციო საბჭო, რომელიც პროექტების შეფასებასთან ერთად მოახდენს საკრედიტო, საფინანსო, ლიკვიდობის,
რეპუტაციული და სხვა სახის რისკების ანალიზს და ფონდის როგორც აღმასრულებელ ისე სამეთვალყურეო საბჭოს დასამტკიცებლად წარუდგენს განსახორციელებელ პროექტებს მათ პერსპექტიულ ანალიზთან ერთად.
რეორგანიზაციის პირველი ეტაპის შედეგია ასევე საპარტნიორო ფონდის მთლიანი სახელფასო ფონდის 30%-ით შემცირება. ყოფილი აღმასრულებელი დირექტორის, ნიკა გილაურის შემდეგ ფონდი დატოვა აღმასრულებელი დირექტორის მოადგილემ, ფინანსთა ყოფილმა მინისტრმა დიმიტრი გვინდაძემ და "საქართველოს რკინიგზის" ყოფილმა ხელმძღვანელმა ირაკლი ეზუგბაიამ.
ფონდის აღმასრულებელი დირექტორის ირაკლი კოვზანაძის განცხადებით ამ ეტაპზე არსებული პროექტების გაგრძელების თაობაზე ეკონომიკურად მართებული და უშეცდომო გადაწყვეტილებების მიღების მიზნით განსაკუთრებული ყურადღება ექცევა დამატებით მათ დამოუკიდებელ ექსპერტულ შესწავლას და ანალიზს.