ახმეტის მუნიციპალიტეტის გამგებლის მოვალეობის შემსრულებლად 25 წლის ბექა ბაიდაური დაინიშნა. ბაიდაური „ქართული ოცნებიდან" ახმეტის მაჟორიტარი დეპუტატის ზურაბ ზვიადაურის მეგობარია. ბექა ბაიდაური აქამდე კახეთის სააღსრულებო ბიუროში აღმასრულებლად მუშაობდა.
როგორც კახეთის საინფორმაციო ცენტრს ახმეტის მუნიციპალიტეტის საკრებულოს თავმჯდომარე ზაქარია ქინქლაძემ განუცხადა, ახმეტის გამგებელმა კობა მაისურაძემ თანამდებობიდან წასვლის შესახებ განცხადება ერთი კვირის წინ დაწერა.
„გამგებლის კონკურსის გზით არჩევის პროცესი დროში იწელება. სანამ კონკურსს გამოვაცხადებთ, საკრებულოს ვთხოვე გამგებლის მოვალეობის შემსრულებლად ბექა ბაიდაური დაემტკიცებინა. საკრებულოს სხდომას 21 დეპუტატი ესწრებოდა და ყველამ თანხმობა გამომიცხადა. ბექა ბაიდაური პროფესიით იურისტია. ჩაბარებული აქვს პროკურატურის და ადვოკატის საკვალიფიკაციო გამოცდები. ასევე, აქვს საარჩევნო მოხელის სერთიფიკატი. ყოფილი სპორტსმენია", - აღნიშნა ქინქლაძემ.
მისივე თქმით, უახლოეს დღეებში შეიქმნება სპეციალური საკონსკურსო - საატესტაციო კომისია და საჯარო მოხელეების შერჩევა კონკურსის გზით მოხდება.
1 ოქტომბრის საპარლამენტო არჩევნების შემდეგ კახეთში გამგებლები შეიცვალნენ თელავის, საგარეჯოს და ახმეტის რაიონებში. სამივე მუნიციპალიტეტში ხელმძღვანელად „ქართული ოცნების" აქტივისტები დაინიშნენ.