რეგიონული განვითარებისა და ინფრასტრუქტურის მინისტრის მოადგილემ, შოთა მურღულიამ, მცხეთა-მთიანეთის რეგიონში მიმდინარე ინფრასტრუქტურული პროექტები მოინახულა და მათ მიმდინარეობას ადგილზე გაეცნო.
მურღულიამ მოინახულა დარიალის ხეობაში მდებარე წმ. მიქაელ და გაბრიელ მთავარანგელოზთა სახელობის სამონასტრო კომპლექსი, რომლის სამშენებლო-სარეაბილიტაციო სამუშაოს რეგიონული განვითარებისა და ინფრასტრუქტურის სამინისტროს საქვეუწყებო ორგანიზაცია შპს "სახელმწიფო სსამშენებლო კომპანია" ახორციელებს. მიუხედავად იმისა, რომ პროექტი მიმდინარე წლის ოქტომბერში უნდა დასრულებულიყო, ამჟამად სამუშაოების მხოლოდ 83% შესრულებული.
მინისტრის მოადგილემ, ასევე, მცხეთა-სტეფანწმინდა-ლარსის საავტომობილო გზის რამდენიმე მონაკვეთი დაათვალიერა, სადაც სარეაბილიტაციო სამუშაო მიმდინარეობს. დასასრულს უახლოვდება აღნიშნულ გზაზე არსებული 2 გვირაბის რეაბილიტაცია. რაც შეეხება აღნიშნული საავტომობილო გზის გუდაური-კობის მონაკვეთს, რომლის რეაბილიტაციაც შპს "სახელმწიფო სსამშენებლო კომპანიის" ქვეკონტრაქტორ კომპანია "ნიუ-ენერჯის" უნდა განეხორციელებინა, სარეაბილიტაციო სამუშაო დაწყებული ჯერაც არ არის. პრობლემებთან არის დაკავშირებული აღნიშნული გზის საქართველო-რუსეთის საზღვართან მდებარე მონაკვეთის რეაბილიტაციის საკითხიც.
მცხეთა-მთიანეთის რეგიონში ვიზიტის ფარგლებში მურღულია დაბა თიანეთში, მუნიციპალური განვითარების ფონდის კოორდინირებით განხორციელებულ სანიაღვრე არხების მოწყობის სამუშაოსაც გაეცნო და სოფელ წეროვანში, დევნილთა დასახლებაში, შიდა გზის აღდგენის სამუშაოც დაათვალიერა.
