,,დემოკრატიის ნამდვილი ტესტი მდგომარეობს იმაში, რომ სხვადასხვა მოთამაშეებმა თანამშრომლობა შეძლონ", -განაცხადა ჟურნალისტებთან ანდრეს ფოგ რასმუსენმა ბიძინა ივანიშვილთან შეხვედრის დასრულების შემდეგ.
მისივე განცხადებით, საქართველოს საპარლამენტო არჩევნები დემოკრატიის სტანდარტების დაცვით ჩატარდა და რასმუსენმა მიხელ სააკაშვილსა და ახალ ხელისუფლებას მოუწოდა იგივე პრინციპების დაცვით იმოქმედონ.
,,მოვუწოდებ ყველა მხარეს დემოკრატიული პროცესის კონსოლიდაცია მოახერხონ. ეს მოიცვას კანონის უზენაესობის, დემოკრატიული სტანდარტებისა და კონსტიტუციის სრულ დაცვას, მაგრამ დემოკრატიის ნამდვილი ტესტი მდგომარეობს იმაში, რომ სხვადასხვა მოთამაშეებმა ქვეყნის საკეთილდღეოდ თანამშრომლობა შეძლონ. მე პრეზიდენტ სააკაშვილსაც მოვთხოვე ორივე თქვენგანმა ითანამშრომლოთ და ერთმანეთის თანაცხოვრება შედეგიანი იყოს კონსტიტუციის სრული დაცვით, ეს მომდევნო თვეებში სასიცოცხლო მნიშვნელობისაა თქვენი ხალხისთვის და თქვენი ქვეყნის მომავლისთვის", _ განაცხადა რასმუსენმა, რომელმაც აღნიშნა, რომ საქართველო ნატოს წევრი გახდება, თუმცა ალიანსში გაწევრიანება უფრო მეტ მუშაობას საჭიროებს.
,,ნატოში გაწევრიანება უფრო მეტს მუშაობასა და რეფორმებს საჭიროებს. საჭიროებს კონსტრუქციულ თანამშრომლობას ხელისუფლების ყველა შტოს შორის. ამიტომ მოგიწოდებთ ყველა მხარეს შეინარჩუნოთ კონსენსუსი საქართველოს ევროატლანტიკური სივრცის მიმართ და მოგიწოდებთ ასევე ერთად იმუშაოთ საჭირო რეფორმების გატარებისთვის უმაღლესი დემოკრატიული სტანდარტების დასაკმაყოფილებლად. დარწმუნებული ვარ, საქართველო ამ ტესტსაც ჩააბარებს ", -განაცხადა რასმუსენმა.
შეგახსენებთ, რომ ბრიუსელში ვიზიტის ფარგლებში ბიძინა ივანიშვილი ანდრეს ფოგ რასმუსენს შეხვდა.
