საქართველოს სოფლის მეურნეობის მინისტრმა საქართველოში შეერთებული შტატების ელჩი რიჩარდ ნორლანდი, ელჩის მოადგილე ბრიჯიტ ბრინქი, USAID-ს რეგიონალური დირექტორი სტივ ჰაიკინი და ეკონომიკური ზრდის ოფისის ხელმძღვანელი დუგლას ბალკო მიიღო.
მინისტრმა სტუმრებს მადლობა გადაუხადა იმ ძალისხმევისთვის, რომელიც შეერთებულმა შტატებმა და მისმა ხელისუფლებამ ქართული სახელმწიფოს განვითარებისთვის განახორციელა. მან ასევე აღნიშნა, რომ შეერთებულ შტატებთან სტრატეგიული პარტნიორობა რჩება საქართველოს ხელისუფლების უმთავრეს პრიორიტეტად.
დავით კირვალიძემ ვრცლად ისაუბრა სოფლის მეურნეობის განვითარების ახალ სტრატეგიაზე და სტუმრებს ის პრიორიტეტები გააცნო, რომელიც უახლოესი წლების განმავლობაში განსაზღვარვს საქართველოს სოფლის მეურნეობის პოლიტიკას.
"სასოფლო-სამეურნეო კოოპერაციების შექმნის პოპულარიზაცია და ხელშეწყობა, საირიგაციო არხების რეაბილიტაცია, მიწის რეგისტრაცია და საკონსულტაციო ექსტენციის ცენტრების დაარსება ყველა რაიონში ჩვენთვის პრიორიტეტული მიმართულებებია", - აღნიშნა დავით კირვალიძემ. მინისტრის განცხადებით, საქართველოსთვის ძალიან მნიშვნელოვანია უცხოელი პარტნიორების დახმარება, უპირველეს ყოვლისა, გამოცდილების გაზიარების კუთხით.
აშშ-ს ელჩის განცხადებით, შეერთებული შტატები მზად არის აქტიურად ჩაერთოს და მხარი დაუჭიროს საქართველოს მთავრობას სასოფლო-სამეურნეო პროექტების განხორციელებაში.
