არის თუ არა გია ქავთარაძე სისხლისსამართლებრივდ პასუხისმგებელი 2006 წლის ციხის ბუნტზე, უნდა გაირკვეს, - განაცხადა იუსტიციის მინისტრმა თეა წულუკიანმა "პრაიმ-ტაიმის" პრესკლუბში". მისი თქმით, შეკთხვები დაესმება ყველა იმ პირს, ვინც შესაძლოა ყოფილიყო ამ საქმეში ჩართული.
იუსტიციის მინისტრი ამბობს, რომ 2006 წლის მარტში ორთაჭალის ციხეში მომხდარი ბუნტის გამო იუსტიციის იმდროინდელ მინისტრ გია ქავთარაძეს პოლიტიკური პასუხისმგებლობა ეკისრება.
წულუკიანის თქმით, ჯერ ნაადრევი და არასერიოზულია საუბარი იმაზე, დაეკისრება თუ არა ქავთარაძეს სისხლისსამართლებრივი პასუხისმგებლობა.
"დადგება თუ არა ყოფილი მინისტრის სისხლის სამართლებრივი პასუხისმგებლობის საკითხი, ამაზე სუბარი არასერიოზული და ნაადრევია ამ ეტაპზე, მაგრამ ერთი რამ ცხადია, ყოველგვარი კვლევისა და გამოძიების გარეშე, რომ ის არის პოლიტიკურად პასუხისმგებელი. არის თუ არა ის სისხლის სამართლებრივდ პასუხისმგებელი, ეს უნდა გაირკვეს, მაგრამ აშკარაა, რომ თუ რომელიმე მინისტრის დაქვემდებარების ქვეშ მყოფ დეპარტამენტში ხდება კაცის კვლა, პოლიტიკური თანამდებობის პირი - მინისტრი, როგორც მინიმუმ, არის პოლიტიკურად პასუხისმგებელი. ამიტომაც იყო, რომ სასწრაფოდ გამოსწორდა ის შეცდომა, რომელიც დაშვებული იქნა ჩვენი მთავრობის მიერ ბატონ ქავთარაძესთან მიმართებაში და როგორც იცით, ის აღარ იკავებს იმ ადგილს, რომელიც მან შეცდომით დაიკავა", - განაცხადა წულუკიანმა.
შეგახსენებთ, რომ დანიშვნიდან ორ დღეში საქართველოს ენერგეტიკისა და ბუნებრივი რესურსების მინისტრის მოადგილე გია ქავთარაძე თანამდებობიდან გადადგა.
