ვლადიმერ პუტინს ძველი ავადმყოფობა შეუბრუნდა, რომელიც სპორტულ ტრამვასთან არის დაკავშირებული. ამის შესახებ თავად პრეზიდენტის პრესმდივანმა მას შემდეგ განაცხადა, რაც რუსულ და დასავლურ მედიაში მითქმა-მოთქმა ატყდა. პრესმდივანი ირწმუნება, რომ მიზეზი პუტინის აქტიური სპორტული ცხოვრებაა და როგორც სპორტსმენებს აწუხებთ ტრამვები ყოველდღიურად, ანალოგიურ მდგომარეობაშია პუტინიც. "ის, პრაქტიკულად, პროფესიონალურ სპორტს მისდევს" - ირწმუნება ჩინოვნიკი პესკოვი.
პრეს-მდივნის განცხადებამდე, ვრცელდებოდა ხმები, რომ პუტინი ავად ერთ-ერთი ფრენის შემდეგ გახდა. მიუხედავად იმისა, რომ ოფიციალური კრემლი საზოგადოებას არწმუნებს, თითქოს ამ თემაზე საუბარი მათ ადრევე დაიწყეს და პუტინის ავადმყოფობის გასაიდუმლოება არ მომხდარა, ფაქტია, რომ ამ სკანდალურ საკითხზე საჯარო კომენტარი, მხოლოდ აჟიოტაჟის ატეხვის შემდეგ გაკეთდა. საქმე იმაშია, რომ ჟურნალისტებმა გამოძიება დაიწყეს, მათ შორის, დასავლურმა მედიამაც. მიზეზი კი გახდა ის ფაქტი, რომ დეკემბერში დაგეგმილი პუტინის ყველა საზღვარგარეთული ვიზიტი, რომელიც ადრევე იყო დაანონსებული, გადაიდო.
პუტინის ჯანმრთელობის მდგომარეობის შესახებ პირველი ინფორმაცია სააგენტო "როიტერმა" გაავრცელა. "შეფი ავადაა" - ციტირებდა საინფორმაციო საშუალება ერთ-ერთი წყაროს წინადადებას, რომელიც, სააგენტოს ცნობით, პუტინთან დაახლოვებული პირია. თუმცა, პრეს-მდივანი პესკოვი თავგამოდებით ირწმუნება, რომ ვიზიტების გადადების არანაირი საერთო მიზეზი არ არსებობს და ყველა ვიზიტის გაუქმებას თავისი განსხვავებული ობიექტური საფუძველი და გარემოებები ახლავს. ხოლო ის, რომ პუტინი საკუთარი სახლიდან, ფაქტობრივად, აღარ გამოდის, კრემლის ჩინოვნიკმა პრეზიდენტის იმ სურვილით ახსნა, რომ ქვეყნის პირველ პირს თურმე მოსკოვში საცობების მინიმუმამდე დაყვანა სურს. კრემლში იმედს გამოთქვამენ, რომ "ტრამვა" პუტინს სამუშაო გრაფიკს არ დაურღვევს.
