ექსპერტს კავკასიის საკითხებში მამუკა არეშიძეს რუსეთის მიერ ოკუპირებული საქართველოს ორი რეგიონის აფხაზეთისა და ე.წ. სამხრეთ ოსეთის აღიარება ბელარუსის მხრიდან ნაკლებსავარაუდოდ მიაჩნია. სააგენტო "ჯი-ეიჩ-ენთან" საუბარში არეშიძე აცხადებს, რომ ყოველ შემთხვევაში, ეს აღიარება "უახლოეს მომავალში" არ მოხდება.
"არ მგონია, რომ ბელორუსმა აღიაროს მათი დამოუკიდებლობა - ყოველ შემთხვევაში უახლოეს ხანში. მე ასე მგონია, რომ ეს ერთი მხრივ, არის დასავლეთზე ზეწოლის ერთ-ერთ ფორმა, იმიტომ რომ ბელორუსს ძალიან გაუფუჭდა ურთიერთობა დასავლეთთან და განსაკუთრებით ევროპასთან", _ აცხადებს "ჯი-ეიჩ-ენთან" საუბარში არეშიძე და აღნიშნავს, რომ მისივე აზრით, ეს არის "გარკვეული შემარბილებელი ჟესტი" რუსეთის ფედერაციასთან მიმართებაში.
"მეორე მხრივ, ეს არის გარკვეული ჟესტი რუსეთის მხრისთვის სიტუაციის მოსარბილებლად, იმიტომ რომ არც რუსეთთან აქვს მაინცდამაინც დალაგებული მდგომარეობა ბელორუსს", _ აცხადებს არეშიძე და არც იმას გამორიცხავს, რომ ამ განცხადებით ბელორუსმა გზავნილი საქართველოს ხელისუფლებას გამოუგზავნა.
"არც იმას არ გამოვრიცხავ, რომ ეს იყოს მესიჯი საქართველოს ხელისუფლებისათვის, რათა მათ აქტიურად გადახედონ თავის საგარეო პოლიტიკას.
ასე რომ ბელორუსის მხრიდან აფხაზეთისა და სამხრეთ ოსეთის აღიარებას არ ველოდები, იმიტომ რომ ეს არის მთავარი კოზირი ბელორუსისათვის ევროპასთან მიმართებაში და ასე მარტივად ის ამ კოზირს არ დათმობს",- აცხადებს მამუკა არეშიძე სააგენტოსთან საუბარში.