.,,ნაციონალურ მოძრაობას" შს მინისტრის მოადგილეებთან დაკავშირებით შეკითხვები აქვს. როგორც პარტიის ცენტრალურ ოფისში გამართულ პრესკონფერენციაზე ,,ნაციონალური მოძრაობის" ერთ-ერთმა ლიდერმა ზურაბ ჯაფარიძემ განაცხადა მინისტრის ზოგიერთი მოადგილის პროფესიულ რეპუტაციაში ეჭვი ეპარება.
,,შს მინისტრის მოადგილეების შერჩეული პირების ნაწილს მაღალი სახელმწიფო თანამდებობები ეკავა, როცა ქვეყნის მართვის პროცესში ჩართული იყვნენ ორგანიზებული დანაშაულის ჯგუფები ე.წ. ქურდების სახით. როდესაც ნარკოტიკების ბრუნვა აკრძალული იყო, თუმცა რეალურად კონტროლდებოდა სამართალდამცავი ორგანოებისა და უშიშროების მიერ, როდესაც კორუფცია საჯარო სამსახურში არნახულ მასშტაბებს აღწევდა და როდესაც საჯარო სამსახურის სტრუქტურებში განსაკუთრებით სამრათალდამცავი და უშიშროების სტრუქტურები გაჯერებული იყო მტერი სახელმწიფოს სამსახურის თანამშრომლებით", _განაცხადა ჯაფარიძემ, რომელმაც აღნიშნა, რომ შსს მინისტრის ერთ-ერთი მოადგილე ლაშა ნაცვლიშვილი 2003 წელს გახმაურებულ კორუფციულ სკანდალში ფიგურირებდა.
მისვე განცხადებით, სწორედ მას ეკუთვნის შემდეგი სიტყვები კერძოდ, ,, ხანდახან ვფიქრობ, რომ შესაძლოა უკეთესი ყოფილიყო, თუ რუსეთი თბილისს აირებდა", -განაცხადა ჯაფარიძემ, რომელმაც აღნიშნა, რომ ლაშა ნაცვლიშვილმა აღნიშნული განცხადება 2008 წელს ერთ-ერთ რუსულ გამოცემასთან გააკეთა.
შეგახსენებთ, რომ შინაგან საქმეთა მინისტრმა ირაკლი ღარიბაშვილმა თავისი მოადგილეების ვინაობა დაასახელა. როგორც ღარიბაშვილმა პრესკონფერენციაზე განაცხადა, პირველი მოადგილის პოსტს ლაშა ნაცვლიშვილი დაიკავებს.რაც შეეხება დანარჩენ მოადგილეებს, ისინი იქნებიან: ლევან იზორია, გელა ხვედელიძე, ალეკო ტაბატაძე, ხოლო შს მინისტრის მეხუთე მოადგილის პოსტი ალექსი ბატიაშვილმა დაიკავა.