საქართველოს ტექნიკურ უნივერსიტეტში შვედ მეცნიერებთან შეხვედრა გაიმართა. შეხვედრა საერთაშორისო საინფორმაციო სემინარის - „შვედეთისა და სამხრეთ კავკასიის თანამშრომლობა უმაღლესი განათლების სფეროში" - ფარგლებში მიმდინარეობდა.
სემინარი 22 ოქტომბერს ივანე ჯავახიშვილის თბილისის სახელმწიფო უნივერსიტეტში გაიხსნა. თბილისში სტუმრად იმყოფება შვედეთის სხვადასხვა უნივერსიტეტის წარმომადგენელთა დელეგაცია, რომლებსაც სურთ საქართველოს, სომხეთისა და აზერბაიჯანის უნივერსიტეტებთან თანამშრომლობა ტემპუსის, ერაზმუს მუნდუსისა და ლინეუს-პალმეს პროგრამების ფარგლებში.
საინფორმაციო სემინარის პროგრამა პრეზენტაციების გარდა, მოიცავდა კონკრეტულ მოლაპარაკებებს ზემოთ ჩამოთვლილი სამი პროგრამის ფარგლებში. შვედ კოლეგებთან შეხვედრაზე განიხილეს სამომავლო თანამშრომლობის დეტალური საკითხები.
სემინარი და ორმხრივი პირდაპირი კონტაქტები ხელს შეუწყობს ტემპუსისა და ერაზმუს მუნდუსის ახალი კონკურსისთვის მზადებას და პარტნიორების მოძიებას.
