საქართველოს პარლამენტის წევრი გივი თარგამაძე უარყოფს ბრალდებებს იმის შესახებ, რომ იგი მოსკოვში არეულობებს აფინანსებდა. განცხადება ამის შესახებ თარგამაძემ დღეს ჟურნალისტებთან საუბრისას გააკეთა.
"რუსეთის სამართლადამცავმა ორგანოებმა ჯერ მიზნად უდალცოვის დაპატიმრება დაისახეს, შემდეგ კი ამ მიზნით ყველანაირი აბსურდის შეგროვება დაიწყეს", _ განაცხადა თარგამაძემ და დაკავებული ლეონიდ რაზვოჟაევის ჩვენებას კიდევ ერთი აბსურდი უწოდა.
"კიდევ ერთი აბსურდი ლეონიდ რაზვოჟაევის ჩვენებაა. რამდენადაც ვიცი, ეს ადამიანი კიევში დააკავეს, სადაც ის გაეროს ადამიანის უფლებების დაცვის უმაღლესი კომისრისადმი მიმართვას აპირებდა. დაკავების შემდეგ, როგორც ჩანს, მისადმი შესაბამისი მეთოდები გამოიყენეს და მანაც იმის საუბარი დაიწყო, რაც რუსულ გამოძიებას აინტერესებდა", _ აცხადებს თარგამაძე.
შეგახსენებთ, რომ რუსეთის ფედერაციის გენერალური პროკურატურის საგამოძიებო კომიტეტის განცხადებით, რუსეთის დუმის დეპუტატის თანაშემწემ ლეონიდ რაზვოჟაევმა გამოძიებას მისცა ჩვენება იმის შესახებ, რომ მასობრივი არეულობების დაფინანსება, რომელიც მოსკოვში 6 მაისს ბოლოტნი მოედანზე ხდებოდა, საქართველოს თავდაცვისა და უშიშროების კომიტეტის ყოფილი ხელმძღვანელის გივი თარგამაძის მიერ ხორციელდებოდა.
საგამოძიებო კომიტეტის ოფიციალური წარმომადგენლის ვლადიმერ მარკინის თქმით, 21 ოქტომბერს რაზვპოჟაევმა თავად მიმართა საგამოძიებო კომიტეტის მთავარ საგამოძიებო სამმართველოს და გამოცხადება ითხოვა.
"მან დეტალურად აღწერა მასა და "მემარცხენე ფრონტის" ლიდერის სერგეი უდალცოვის, ასევე სხვა პირების მიერ რუსეთის ფედერაციის ტერიტორიაზე მასობრივი არეულობების ორგანიზება, ასევე აღნიშნული პირების თანამონაწილეობა 6 მაისს ბოლოტნი მოედანზე მიმდინარე არეულობებში", _ განაცხადა მარკინმა და აღნიშნა, რომ როგორც რაზვიჟაევის ჩვენებიდან ირკვევა ამ არეულობების "დაფინანსება თარგამაძის მხრიდან ხდებოდა".
თავის მხრივ, ოპოზიციური "მემარცხენე ფრონტის" ლიდერი სერგეი უდალცოვი უარყოფს რუსეთის ფედერაციის გენერალური პროკურატურის საგამოძიებო კომიტეტის მიერ გავრცელებულ ინფორმაციას იმის შესახებ, რომ მაისში მოსკოვში "მილიონიან მარშს" ქართული მხარე აფინანსებდა.
"რუსეთის ფედერაციის გენერალური პროკურატურის საგამოძიებო კომიტეტის მიერ გავრცელებული განცხადება - ეს ან დეზინფორმაციაა ან მათ აიძულეს რაზვოჟაევი ასეთი რამ ეთქვა, შესაძლოა ძეწოლითა და წამების ქვეშ",_ აცხადებს უდალცოვი და აღნიშნავს: "სრული პასუხისმგებლობით ვაცხადებ, რომ ეს ინფორმაცია რეალობას არ შეესაბამება. არავითარი დაფინანსება არც 6 მაისს და არც სხვა აქციების დროს ვიღაც თარგამაძის მხრიდან არ ყოფილა", _ აცხადებს უდალცოვი.