"ნაციონალურ მოძრაობას" არ უნდა მიეცეს საშუალება, მოისხას წამებული დემოკრატის მანტია, - ამის შესახებ "ქართული ოცნების" პარლამენტის თავმჯდომარეობის კანდიდატმა დავით უსუფაშვილმა "ქორთიარდ მარიოტში" მიმდინარე კონფერენციაზე განაცხადა.
მისი თქმით, არჩევნების შემდეგ გარკვეული საფრთხეები არსებობს ორივე პოლიტიკური ძალის მიმართ - გამარჯვებულ ძალას ემუქრება საფრთხე, მოისხას მორალისტი ინკვიზიტორის მანტია, რადგან ძალიან ბევრი ქონებაა მოპარული და ამის გამო შესაძლოა, თვალი რევანშისკენ გაგვექცეს.
"ეს არ უნდა დავუშვათ. თუმცა, ფაქტია ისიც, რომ თუ ახალმა ხელისუფლებამ ძველ დანაშაულებზე რეაგირება არ მოახდინა, გამოდის, რომ ის საზოგადოებამ ტყუილად აირჩია. თუმცა, კონკრეტული დარღვევები ჩვენი გადასაწყვეტი არ უნდა იყოს და ეს საკითხები დამოუკიდებელმა სასამართლომ უნდა განიხილოს. ამავე დროს, "ნაციონალურ მოძრაობას" არ უნდა მიეცეს საშუალება, მოისხას წამებული დემოკრატის მანტია", - განაცხადა დავით უსუფაშვილმა.
