მართალია ახალი კონსტიტუცია ჯერ ძალაში არ შესულა, მაგრამ პატივი უნდა ვცეთ ამომრჩევლების ნებას, - განაცხადა უშიშროების საბჭოს მდივანმა გიგა ბოკერიამ ტელეკომპანია "რუსთავი 2-ის" ეთერში.
როგორც ბოკერიამ აღნიშნა, მისთვის გაუგებარია რას გულისხმობდა ივანიშვილი პოლიტიკურ კრიზისში.
მისი თქმით, შესაძლოა ივანიშვილს ვინმემ მიაწოდა ინფორმაცია, რომ პრეზიდენტმა არ სთქვა ნათლად თავისი სათქმელი. "მაშინ როდესაც ძალიან გარკვევითი თქვა - ქართველმა ხალხმა თავისი ნების ასე მკაფიოდ გამოხატვის ფარგლებში, ახლა დაიწყება პროცედურა ახალი საპარლამენტო უმრავლესობის მიერ პარლამენტის დაკომპლექტების", - განაცხადა ბოკერიამ და აღნიშნა, რომ მართალია ახალი კონსტიტუცია ჯერ ძალაში არ არის შესული, მაგრამ ფაქტობრივად, "პატივი უნდა ვცეთ ამომრჩევლების ნებას".
"დღეს იმდენად მკაფიო უმრავლესობით მოვიდა ქართული ოცნება პარლამენტში 55 თუ 56 %-ი აიღეს, იქნებოდა შეურაცხყოფა ამომრჩევლების რომ არსებული კონსტიტუციის პროცედურებით, ჩვენ - ანუ საქართველოს პრეზიდენტს - დაეწყო გაწელვა პროცესის. ამის შესაძლებლობა თეორიული და ტექნიკური არსებობს, ხაზს ვუსვავ, რომ ახალი კონსტიტუცია ჯერ ძალაში არ არის შესული და შესაძლოა პრეზიდენტს წარედგინა სხვა მთავრობა, რომელსაც მხარს არ დაუჭერდა პარლამენტი, შემდეგ 6 თვე არჩევნები ვერ ინიშნება კონსტიტუციით და იქნებოდა ეს ვითარება, რომ მთავრობა იქნებოდა მოვალეობის შემსრულებელი, მაგრამ მესამეჯერ ვიმეორებ: ეს იქნებოდა იმ მკაფიო ნების უპატივცემულობა, რომელიც გამოხატა საქართველოს ამომრჩეველმა", - განაცხადა ბოკერიამ.
მისი თქმით, ეს არ არის გრძელი პროცესი. "აქ ის საუბარი, რომ ვიღაცა არ მიიღებს; რომ პრეზიდენტის მიერ იქნება წარდგენილი, ჩემთვის არის გაუგებარი და ჩემი აზრით, ქართული საზოგადოებრიობისთვის შეურაცხმყოფელიც კი", - განაცხადა ბოკერიამ და აღნიშნა, რომ ეს პიროვნებებზე კი არ არის აქ საუბარი, აქ საუბარია, ქართული საზოგადოების ნებასა და დემოკრატიაზე. "კრიზისის შექმნა ვინმეს თუ უნდა, ეს იქნება ძალიან სახიფათო არჩევანი", - განაცხადა ბოკერიამ.
