"ოპოზიციური ბლოკის "ქართული ოცნების" მოსალოდნელი გამარჯვება საპარლამენტო არჩევნებში იძლევა იმედს იმისა, რომ მოსკოვსა და თბილისს შორის დიალოგი გაუმჯობესდება",_ ეს განცხადება რუსული პოლიტიკური ცენტრის "სევერ-იუგ" -ის აღმასრულებელმა დირექტორმა ალექსეი ვლასოვმა გააკეთა.
"ერთ ერთ ბოლო მიტინგზე სიტყვით გამოსვლისას ივანიშვილმა ძალიან მკაფიოდ განაცხადა, რომ საპარლამენტო, შემდეგ კი საპრეზიდენტო არჩევნებში გამარჯვების შემთხვევაში მისი საქმიანობის ერთ-ერთი პრიორიტეტული მიმართულება რუსეთთან ახალი ფორმატის ეკონომიკური ურთიერთობების აღდგენა იქნება. ეს კი მოსკოვსა და თბილისს შორის დიალოგის დალაგებას გულისხმობს და ქართველი ამომრჩევლის უმრავლესობის ნების გამომხატველია",_ აცხადებს ვლადოვი და აღნიშნავს, რომ ეს ძალიან მნიშვნელოვანია ვინაიდან ანგრევს მითს იმის შესახებ, თითქოს ქართველი ამომრჩევლისათვის რუსეთი საინტერესო არ არის.
ქართული ოპოზიციის გამარჯვების მიზეზად ვლასოვმა ივანიშვილის მიერ წარმატებულად ჩატარებული და დაბოლოებული საარჩევნო კამპანია და ხელისუფლების პარტიის საიმიჯო პროექტების ჩავარდნა დაასახელა.
"გონივრული კამპანია, განსაკუთრებით ბოლო თვეებში, როდესაც საკმაოდ ცხადად შეიცვალა მიტინგებზე ივანიშვილის რიტორიკა, სხვანაირად დაიწყო მუშაობა ივანიშვილის მიერ კონტროლირებადმა მედიამ, ისინი უფრო აგრესიულები, შედეგზე ორიენტირებული თეზისები კი უფრო კონკრეტული გახდა.
მეორე ეს - ხელისუფლების შეცდომებია. ციხეში პატიმრებთან დაკავშირებულმა სკანდალმა მძლავრად დაარტყა მმართველი პარტიის იმიჯს, ვინაიდან ის მიხეილ სააკაშვილისა და ვანო მერაბიშვილის პიროვნებასთან ასოცირდება, რომელიც ახლანდელი ლიდერის მემკვიდრედ ითვლება",_ აცხადებს ვლასოვი და აღნიშნავს, რომ დრო როდესაც ციხეებში წამების ამსახველი კადრები გავრცელდა ძალიან კარგად იყო შერჩეული.
"იმ ამომრჩევლებმა რომლებსაც იმ მომენტისათვის თავისი არჩევანი ჯერ კიდევ გაკეთებული არ ჰქონდათ, ამ კადრების დემონსტრირებით ეტყობა იმდენად აღშფოთდნენ, რომ მიიღეს გადაწყვეტილება გულის კარნახით მიეცათ ხმა", _ აცხადებს ექსპერტი ვლასოვი.
