მედია-კავშირ „ობიექტივის" ხელმძღვანელი ირმა ინაშვილი საპარლამენტო არჩევნებთან დაკავშირებით განცხადებას ავრცელებს.
„ბოროტი რეჟიმი, რომელიც ცხრა წელიწადია წურბელასავით სვამს ქართველი ხალხის სისხლს, ვერა და ვერ გაძღა. არც ჩვენ გვანებებს თავს და არც ჩვენს სამშობლოს. ბოროტებმა, ჩამოეხსნათ რა ნიღაბი, ახალი მზაკვრობა გაგვიმზადეს: თან გვითხრეს,- არჩევნები წავაგეთო. თან ცდილობენ (ამ წაგებულ არჩევნებში) მოგება გაიფორმონ. როგორ? როგორ და ასე: „ქართულ ოცნებას" 53-55%-ს დაუწერენ, თავისთვის კი, საბოლოო ჯამში, 45%-ს დაიწერენ, რაც, ცხადია, უსინდისო ტყუილია. ყველამ ვიცით, რომ ნიღბის ჩამოხსნამდე „ნაციონალური მოძრაობის" რეიტინგი (მიუკერძოებელი კვლევებით, მათ შორის, „ობიექტივის" კვლევითაც) 22-24%-ს არ აღემატებოდა, ხოლო ნიღბის ჩამოხსნის შემდეგ, „ნაციონალური მოძრაობა" თავისსავე წევრებმა დატოვეს და ბუნებრივია, მისი რეიტინგი კიდევ უფრო დაეცა... მაგრამ ეს არ არის ყველაზე დიდი ტყუილი, რომელსაც „ნაცები" თავს გვახვევენ. ყველაზე დიდი ტყუილი მაჟორიტარ დეპუტატებთანაა დაკავშირებული. დიქტატორი გვარწმუნებს, რომ 50-ზე მეტი მაჟორიტარი დეპუტატი ჰყავს, რაც, რაც თქმა უნდა, მორიგი უსინდისო ტყუილია. თუ გავიხსენებთ, რომ პარლამენტში სულ 150 დეპუტატია, წურბელა რეჟიმი „დიპლომატიურად" გვეუბნება,- ახალ საკანონმდებლო ორგანოში უმრავლესობა კვლავ მე მეყოლებაო.
ხალხნო, გამოვფხიზლდეთ, ეიფორიისა და სიხარულის ჟამი ჯერ არ მოსულა. გუშინ მატყუარა რეჟიმმა საპნის ბუშტი გადმოგვიგდო. გამოაცხადა, რომ აგებს... ხალხს საზეიმო განწყობა შეუქმნა, ამ განწყობის გამოხატვის საშუალებაც მისცა, საზოგადოება დაამშვიდა და ახლა ზემოაღწერილ ფარული გეგმას ნელ-ნელა ასაჯაროებს. ცოტა ხანში ცენტრალური საარჩევნო კომისია ამ სიცრუეს დაგვიკანონებს და წურბელები უმრავლესობით მოგვევლინებიან პარლამენტში.
ამ მზაკვრული გეგმის ხორცშესხმა ჩვენ არაფრით არ უნდა დავუშვათ. უნდა გამოვიდეთ ქუჩაში და ბოლომდე დავიცვათ ჩვენი ხმები, ბოლომდე უნდა აღვასრულოთ ჩვენი ქართული მოვალეობა( ექვთიმე თაყაიშვილის სიტყვები). უნდა მოვთხოვოთ ოპოზიციას,- აღასრულოს თავისი მოვალობა, დაიცვას ქართველი ხალხის ნება და არჩევანი. არავითარი 51%-ი, არც 53%-ი და არც 55%-ი, არამედ რეალური- 77%-ი, როგორც პარტიული, ასევე, მაჟორიტარული სიით. ვიმეორებ: 77%-ი და არც ერთი პროცენტით ნაკლები!",-აღნიშნულია ირმა ინაშვილის „facebook"-ზე გავრცელებულ განცხადებაში.