"ქართული ოცნების" პრესსპიკერი მაია ფანჯიკიძე კოალიციის მხარდამჭერებზე ზეწოლის ფაქტებზე საუბრობს. როგორც ჟურნალისტებთან ფანჯიკიძემ განაცხადა უცნობმა პირებმა ,,ქართული ოცნების" ცენტრალური ოფისის დაცვის თანამშრომლის შვილი გაიტაცეს და სასტიკად გაუსწორდნენ.
"დავით ცისკარიშვილი გუშინ საღამოს სანზონაში # 141 საჯარო სკოლის ტერიტორიაზე უცხო პირებმა მანქანაში იძულებით ჩასვეს. მანქანაშივე მიაყენეს ფიზიკური შეურაცხყოფა. შემდეგ წაიყვანეს დაუსახლებელ ადგილას, კუკიის საასაფლაოს მიმდებარე ტერიტორიაზე, სადაც განახორციელეს მუქარა, რომ თუ წესიერად არ მოიქცეოდა მას ოჯახს ამოუწყვეტდნენ", _განაცხადა ფანჯიკიძემ.
მისივე განცხადებით, დავით ცისკარიშვილს უცნობი პირები სასტიკად გაუსწორდნენ.
,,ის სასტიკად გალახეს ხელკეტით. თავის არეში რამდენჯერმე დაარტყეს. Mმას შემდეგ, რაც ცისკარიშვილი უგონო მდგომარეობაში მიწაზე დაეცა ხელებზე გადაუარეს მანქანით და წავიდნენ", _ განაცხადა ფანჯიკიძემ, რომელმაც აღნიშნა, რომ ცისკარიშვილმა, ,ქართული ოცნების" ოფისში დაბრუნება გამვლელი ტაქსის მძღოლის დახმარებით მოახერხა.
ფანჯიკიძის განცხადებით, დავით ცისკარიშვილი მკურნალობის კურსს საავადმყოფოში გადის.
"დავით ცისკარიშვილს საავადმყოფოში მრავლობითი დაზიანებები დაუდგინდა და ხელი თაბაშირში აქვს ჩასმული და ახლაც საავადმყოფოში", _ განაცხადა ფანჯიკიძემ.
მისივე განცხადებით, მომხდარი ფაქტის შესახებ უწყებათაშორის კომისიას უკვე მიმართეს.
"ფაქტის შესახებ ინფორმაცია მივაწოდეთ უწყებათაშორის კომისიას. Gგარდა ამისა, მივმართეთ საერთაშორისო ორგანიზაციებს და საქართველოში აკრედიტებულ დიპლომატიური კორპუსის წარმომადგენლებს", _განაცხადა ფანჯიკიძემ.