ხვალ, 6 სექტემბერს, საარჩევნო კოდექსის საფუძველზე საქართველოს ცესკოს თავმჯდომარე პარტიულ სიებს და პარტიის/საარჩევნო ბლოკის მიერ წარდგენილ კანდიდატებს რეგისტრაციაში გაატარებს.
რეგისტრაცია ხდება იმ შემთხვევაში თუ წარდგენილი პარტიული სია და თანდართული საბუთები შეესაბამება საარჩევნო კოდექსით დადგენილ მოთხოვნებს.
იმ შეთმთხვევაში კი თუ პარტიულ სიასა და თანდართულ საბუთებში არის მონაცემების შეუსაბამობა, ცესკო ამის შესახებ წერილობით აცნობებს პარტიის/საარჩევნო ბლოკის წარმომადგენელს.
ხვალვე, შესაბამისი საოლქო საარჩევნო კომისიის თავმჯდომარეები რეგისტრაციაში გაატარებენ პარტიის/საარჩევნო ბლოკის მიერ საარჩევნო ოლქში წარდგენილ საქართველოს პარლამენტის წევრობის მაჟორიტარ კანდიდატებს.
დოკუმენტაციებში შეუსაბამობის შემთხვევაში კი წერილობით აცნობებენ პარტიის/საარჩევნო ბლოკის
წარმომადგენელს საარჩევნო კოდექსით დადგენილ მოთხოვნებთან საბუთებში არსებული მონაცემების შეუსაბამობის შესახებ.
საოლქო საარჩევნო კომისიის თავმჯდომარეები ვალდებულნი არიან რეგისტრაციიდან სამი დღის ვადაში საქართველოს პარლამენტის წევრობის კანდიდატს გადასცენ შესაბამისი მოწმობა.
ამავდროულად ცესკომ პრესითა და მასობრივი ინფორმაციის სხვა საშუალებებით უნდა გამოაქვეყნოს
რეგისტრირებული პარტიული სიები, აგრეთვე მაჟორიტარულ საარჩევნო ოლქში რეგისტრირებულ კანდიდატთა ის მონაცემები, რომლებიც შეიტანება საარჩევნო ბიულეტენში.
შეგახსენებთ, რომ საქართველოს პარლამენტის არჩევნები 1-ელ ოქტომბერს გაიმართება.
