5 სექტემბერს საქართველოში ყოველწლიური ამბასადორიალი გაიმართება. საქართველოში, ნატო-ს სახელმწიფოების საგარეო საქმეთა მინისტრებთან ერთად, ალიანსის გენერალური მდივანიც ჩამოვა. ანდერს ფოგ რასმუსენი სიტყვით გამოვა და მაღალი რანგის პირისპირ შეხვედრებს გამართავს.
ქვეყანაში ჩამოსული მაღალი რანგის დელეგაციები და დიპლომატიური მისიების წარმომადგენლები 2012-2013 წლის პრიორიტეტებს განიხილავენ და სამოქმედო სტრატეგიაზე იმსჯელებენ. ისაუბრებენ ასევე შიდა პოლიტიკის მთავარ პრიორიტეტებზეც.
ამბასადორიალის ფარგლებში, ჩვენ ქვეყანაში ჩამოსული დელეგაციები შეხვდებიან საქართველოს აღმასრულებელი ხელისუფლების წარმომადგენლებს და საქართველოს პრეზიდენტ მიხეილ სააკაშვილს.
ამბასადორიალის ფარგლებში, საქართველოს ამერიკელი სენატორები ჯონ მაკკეინი და ჯონ ლიბერმანიც ეწვევიან. უშიშროების საბჭოს მდივნის მოადგილე ბათუ ქუთელიას განცხადებით, ამ ვიზიტით ამერიკის შეერთებული შტატების მხარდაჭერა საქართველოს მიმართ კიდევ ერთხელ გამოვლინდება.
ქუთელიას თქმით, ამერიკელი სენატორების ქვეყანაში ჩამოსვლა საქართველოს მიერ წინ გადადგმული ნაბიჯების აღიარებად უნდა შეფასდეს.
ამბასადორიალზე დასასწრებად საქართველოში უკვე ჩამოვიდა ფიჯის კუნძულების საგარეო საქმეთა მინისტრი. ის ორმხრივ შეხვედრებს დღეიდან დაიწყებს.
ვიზიტისა და ამბასადორიალის ფარგლებში გასამართი ღონისძიებების ფარგლებში, საქართველოში ელჩების შეხვედრა იგეგმება, სადაც ფიჯის კუნძულების საგარეო უწყების ხელმძღვანელი სიტყვით გამოვა და საქართველოში მოახლოებულ საპარლამენტო არჩევნებზე ისაუბრებს.
