12 აგვისტოდან ძალაში შედის ქვეყნის მთავარი აუდიტორის ბრძანებულება, რომლის მიხედვითაც, წინასაარჩევნო რეკლამისთვის საეთერო დროის ან/და გაზეთის ფართობის შესყიდვისთვის პოლიტიკურ პარტიებს წინასწარი ანგარიშსწორების განხორციელება დაევალებათ. როგორც ირკვევა, ახალი რეგულაციების შემოღება წინასაარჩევნო კამპანიის დაფინანსების გამჭვირვალობასთან დაკავშირებული ზოგიერთი საკითხის მოწესრიგების მიზნით გადაწყდა.
მთავარი აუდიტორის ბრძანებულების თანახმად, "მოქალაქეთა პოლიტიკური გაერთიანების შესახებ" საქართველოს ორგანულიკანონის 322 მუხლის, 341 მუხლის პირველი პუნქტისა და მე-2 პუნქტის "ე" ქვეპუნქტის, "სახელმწიფო აუდიტის სამსახურის შესახებ" საქართველოს კანონის მე-10 მუხლის "მ" ქვეპუნქტის შესაბამისად: წინასაარჩევო რეკლამისთვის საეთერო დროის ან/და გაზეთის ფართობის შესყიდვა უნდა განხორციელდეს წინასწარი ანგარიშსწორების წესით. წინასაარჩევნო კამპანიის მიმდინარეობისას, საარჩევნო სუბიექტი ვალდებულია წინასწარ გადაიხადოს ერთი კვირის განმავლობაში ფასიანი რეკლამის განთავსებისათვის საეთერო დროის ან/და გაზეთის ფართობის ღირებულება განსაზღვრული ტარიფების შესაბამისად.
"საარჩევნო სუბიექტებმა, მაუწყებლებმა და გაზეთებმა ამ ბრძანების პირველი პუნქტით გათვალისწინებული ანგარიშსწორების შესახებ ინფორმაცია მიაწოდონ საქართველოს სახელმწიფო აუდიტის სამსახურს ანგარიშსწორების განხორციელებიდან არა უგვიანეს 24 საათისა", - ნათქვამია ლაშა თორდიას განცხადებაში.
სახელმწიფო აუდიტის სამსახურში აცხადებენ, რომ საქართველოს სახელმწიფო აუდიტის სამსახური ახორციელებს პარტიების ფინანსური საქმიანობის კანონიერებისა და გამჭვირვალობის მონიტორინგს.
ამ კომპეტენციის ფარგლებში, სახელმწიფო აუდიტის სამსახურმა მიზანშეწონილად მიიჩნია წინასაარჩევნო კამპანიის დროს გარკვეული რეგულაციები დააწესოს მაუწყებელსა და პოლიტიკურ სუბიექტს შორის ურთიერთობებში.
აღნიშნული განპირობებულია მაღალი საჯარო ინტერესით, მოხდეს ყველა მაუწყებლის მიერ საარჩევნო სუბიექტების თანაბარ და არადისკრიმინაციულ მდგომარეობაში ჩაყენება, და ამ პროცესში ფინანსური რესურსების გამჭვირვალედ გამოყენება.
შესაბამისად, სახელმწიფო აუდიტის სამსახურმა, გენერალური აუდიტორის ბრძანებით, განმარტა გამჭვირვალობის სტანდარტები წინასაარჩევნო პერიოდში სარეკლამო ხარჯებთან მიმართებაში. სახელმწიფო აუდიტის სამსახური განმარტავს, რომ გენერალური აუდიტორის ბრძანებით დადგენილი რეგულაციები, ერთის მხრივ, არ აფერხებს პოლიტიკური სუბიექტებისთვის კანონით უზრუნველყოფილ უფლებას შეუფერხებლად აწარმოონ საარჩევნო აგიტაცია. მეორეს მხრივ, აღნიშნული რეგულაციები უზრუნველყოფს ფინანსური რესურსების განკარგვის ეფექტურ მონიტორინგს და ამ გზით ახდენს საარჩევნო სუბიექტების ან/და მაუწყებლების მიერ კანონის მოთხოვნათა დარღვევის რისკების მინიმიზაციას. შესაბამისად, კერძო და საჯარო ინტერესების შეჯერების გზით, გენერალური აუდიტორის ბრძანებით დადგენილი რეგულაციები ხელს უწყობს ლეგიტიმური ინტერესის - ფინანსურად გამჭვირვალე ჯანსაღი საარჩევნო გარემოს დამკვიდრებას.
