ხელისუფლების მხრიდან კოალიცია ,,ქართული ოცნების" აქტივისტების დაკავება გასაკვირი არ უნდა იყოს, პირიქით მოსალოდნელია დაკავებულთა რაოდენობა უახლოეს მომავალში კიდევ გაიზარდოს, - განაცხადა ,,ჯი-ეიჩ-ენთან" კოალიცია ,,ქართული ოცნების" ერთ-ერთმა ლიდერმა ვიქტორ დოლიძემ შსს მიერ ,,ქართული ოცნება_დემოკრატიული საქართველოსა" და ,,თავისუფალი დემოკრატების" წევრის დაკავების ფაქტთან დაკავშირებით და აღნიშნა, რომ მმართველი გუნდი თავისი ქმედებებით ვერავის შეაშინებს.
,,მართალი გითხრათ, ჩვენ უკვე შევეჩვიეთ იმ ფაქტს, რომ ყოველდღე ვიღაცას აკავებენ. ხელისუფლების მხრიდან ველოდებით, რომ დაკავები უფრო გაიზრდება, მაგრამ ამით ვერავის ვერ შეაშინებენ", - განაცხადა დოლიძემ, რომელმაც აღნიშნა, რომ ,,ქართული ოცნების" აქტივისტებს პროკურატურაში იბარებენ.
,,ახლა პარტიის ოფისში იმყოფებიან ჩვენი აქტივისტები, რომლებსაც პროკურატურაში იბარებენ მხოლოდ და მხოლოდ იმის გამო, რომ ისინი ,,ქართული ოცნების" მუშაობაში არიან ჩართულები. სახელ-გვარებს შეგნებულად არ დავასახელებ, რადგან ეს პრობლემა იქნებ მისი აფიშირების გარეშე მოგვარდეს მოგვარდეს და ჩვენს აქტივისტებს საქმე უფრო არ გავუფუჭოთ", - განაცხადა ,,ჯი-ეიჩ-ენთან" დოლიძემ.
შეგახსენებთ, რომ შსს პოლიციელის მოსყიდვის ბრალდებით ,,ქართული ოცნების" ორი წევრი დააკავა.