იურიდიულ საკითხთა საპარლამენტო კომიტეტის თავმჯდომარის, პავლე კუბლაშვილის შეფასებით, "ნაციონალური მოძრაობის" კოორდინატორების მიერ ამომრჩევლების სურვილების სიის შედგენა მხოლოდ ინფორმაციის შეგროვებაა.
როგორც მან ჟურნალისტებთან ამომრჩევლის პრობლემებისა და სურვილების სიის შედგენის ფაქტის შეფასებისას განაცხადა, მას ასეთი ინფორმაცია არ აქვს, თუმცა კონტროლის პალატამ მსგავსი ფაქტები აუცილებლად უნდა შეისწავლოს.
"ინფორმაციის შეგროვება ქალაქებისა თუ სოფლების პრობლემებზე - ეს ნებისმიერი პოლიტიკური პარტიის ამოცანაა. პრობლემები შეიძლება უკავშირდებოდეს დაზღვევას, გზას და ა.შ.", - დასძინა კუბლაშვილმა.
ჟურნალისტებისგან, კონკრეტული კოორდინატორების მიერ დასაქმების თუ ოპერაციის მსურველების სიის შეგროვების შესახებ ინფორმაციის მოსმენის შემდეგ, კუბლაშვილმა მათ ამ საკითხით დაინტერესებისთვის უსაყვედურა.
"არ მახსოვს თქვენი ასეთი აქტიურობა იმ ფაქტთან დაკავშირებით, როცა საუბარი იყო სარეცხი მანქანების, კომპიუტერების თუ სხვა 1000 ლარამდე საჩუქრების გადაცემაზე", - მიმართა ჟურნალისტებს კუბლაშვილმა და დასძინა, რომ მათ "ნაციონალური მოძრაობის" კოორდინატორების შესახებ არასწორი ინფორმაცია აქვთ.
