"ალიანსმა 2008 წლის მოვლენებიდან დასკვნები ვერ გამოიტანა", _ ეს განცხადება რუსეთის საგარეო საქმეთა სამინისტროს ოფიციალურმა წარმომადგენელმა ალექსანდრე ლუკაშევიჩმა მოსკოვში გამართულ ბრიფინგზე გააკეთა და აღნიშნა, რომ რუსეთმა სინანულით მიიღო ნატოს მიერ საქართველოს მიმართ გაკეთებული განცხადება.
"ერთ-ერთი ასეთ რთულ საკითხთაგანი არის სიტუაცია სამხრეთ კავკასიაში, რომელიც აფხაზეთს, საქართველოსა და სამხრეთ ოსეთს შორის კეთილმეზობლური ურთიერთობების დამყარებას ეხება", _ განაცხადა ლუკაშევიჩმა.
მისივე თქმით, ამ კონტექსტში ოფიციალურმა მოსკოვმა "სინანულითა და შეშფოთებით მიიღო ჩიკაგოში ნატოს სამიტის მიერ გაკეთებული განცხადების ის ელემენტები, რომლებშიც ნატო ადასტურებს ყველა ადრე მიღებულ გადაწყვეტილებას საქართველოსთან მიმართებაში და მოუწოდებს რუსეთს აფხაზეთისა და სამხრეთ ოსეთის აღიარების შესახებ მის მიერ მიღებულ გადაწყვეტილებას გადახედოს".
"ცხადია, რომ ნატომ მაინც ვერ გამოიტანა პრინციპული დასკვნები 2008 წლის ტრაგიკული მოვლენებიდან", _ განაცხადა რუსეთის საგარეო საქმეთა სამინისტროს ოფიციალურმა წარმომადგენელმა.