სეპარატისტული აფხაზეთის ე.წ. საგარეო საქმეთა მინისტრის მოადგილე ირაკლი ხინთბა საქართველოს უშიშროების საბჭოს მდივანს გიგა ბოკერიას ურჩევს ნაკლებად გააკეთოს განცხადებები საგარეო პოლიტიკურ თემებზე. ეს განცხადება ხინთბამ აფხაზურ მედიასთან საუბარში გიგა ბოკერიას განცხადების კომენტირებისას გააკეთა, რომელშიც საქართველოს უშიშღოების საბჭოს მდივანმა აფხაზი სეპარატისტების მიერ შექმნილ ე.წ. საგარეო საქმეთა სამინისტროს რუსეთის მარიონეტები უწოდა.
"ბატონი ბოკერია საქართველოში გავლენიანი პირია. ჩემი აზრით, თავისი ქვეყნის პატარა ინტელიგენტური იმიჯის შესანარჩუნებლად და ასევე რეგიონში მშვიდობისა და სტაბილურობის დამყარებისათვის მან საგარეო პოლიტიკურ თემებზე განცხადებები ნაკლებად უნდა აკეთოს.
აფხაზეთისა და სხვა მეზობელი ქვეყნების მიმართ რთული და ფაქიზი საკითხების გადაწყვეტა ნაჯახისა და დიდი ჩაქუჩის გამოყენებით საუკეთესო საშუალება ნამდვილად არ არის", _ აცხადებს ირაკლი ხინთბა.