ქუთაისის მაჟორიტარ დეპუტატს აკაკი ბობოხიძეს ბუნებრივად მიაჩნია, რომ ვინმეს პარლამენტის ქუთაისში გადატანა არ აწყობდეს. ამის შესახებ მან პრეზიდენტის განცხადების შეფასებისას განაცხადა, რომლის თანახმადაც, ვინც ქუთაისში პარლამენტის გადატანას ეწინააღმდეგება პირდაპირ ემსახურება საქართველოს მტერს.
ბობოხიძის განცხადებით, მას არ მოუსმენია პრეზიდენტის სიტყვა, თუმცა თავად ასეთი მძაფრი მაინც ვერ იქნებოდა, თუნდაც, პარლამენტის აპარატის თანამშრომლების განწყობის მიმართ, რომელთა უმეტესობა შესაძლოა ქუთაისში ვერ გადავიდეს.
,,ბუნებრივია და შესაძლოა მათაც არ მოსწონდეთ პარლამენტის ქუთაისში გადატანა, მაგრამ თუ დაინახავენ ამის საჭიროებას - მე კი ამას ვხედავ - დისკომფორტის მიუხედავად, პარლამენტის გადატანის პროცესში მაინც ჩაერთვებიან",, - აღნიშნა დეპუტატმა და არც ის გამორიცხა, რომ შესაძლოა ვინმეს მართლაც პრეზიდენტის მიერ დასახელებული მიზეზით არ სურდეს აღნიშნული ცვლილება.
პრეზიდენტმა მიხეილ სააკაშვილმა ქუთაისში სიტყვით გამოსვლისას განაცხადა, რომ დღეს საქართველოში არიან პოლიტიკოსები, რომლებიც ისტერიულად, გააფთრებით ეწინააღმდეგებიან იმას, რომ პარლამენტი ქუთაისში გადმოვიდეს და ეს ხალხი პირდაპირ ემსახურება საქართველოს მტერს. მისივე თქმით, ამ ხალხს, გარდა იმისა, რომ ისედაც ემსახურებიან მტერს, რუსეთის დროშის ფერებში აქვთ გადაწყვეტილი მთელი თავისი საქმიანობა.