"სახალხო კრების" აღმასრულებელი საბჭო განცხადებას ავრცელებს. "მოულოდნელი აღმოჩნდა ის, რაც წავიკითხეთ გაზეთ "ალიაში", თითქოსდა ბიძინა ივანიშვილი გამოთქვამს ეჭვს ნინო ბურჯანაძის ხელისუფლებასთან გარიგების თაობაზე.
"სახალხო კრების" აღმასრულებელი საბჭო აცხადებს, რომ გაზეთში დაბეჭდილი ბრალდება უმძიმესია როგორც პოლიტიკური, ისე მორალური თვალსაზრისით და მათ მიერ აღიქმება როგორც განხეთქილების შეტანის მცდელობა ერთიან გუნდში, რაც კატეგორიულად მიუღებელია.
"ჩვენთვის და საზოგადოებისთვის პრინციპულად მნიშვნელოვანია, რომ გაირკვეს ნამდვილად იქნა თუ არა გამოთქმული აღნიშნული ბრალდებები ბიძინა ივანიშვილის მხრიდან. საზოგადოების ინტერესშია, რომ ამ შეკითხვაზე პასუხი უმოკლეს ვადებში იქნეს გაცემული, ვინაიდან ამ ტიპის განცხადებები ბუნებრივად აღიქმება როგორც დაპირისპირება ოპოზიციურ სპექტრში", - აღნიშნულია განცხადებაში.
მათი განცხადებით, ივანიშვილის ფიგურიდან გამომდინარე, საზოგადოება ინფორმაციას მის ზუსტ პოზიციასთან დაკავშირებით სწორედ მისგან - ივანიშვილისაგან მოელის.
"ჩვენ არაერთხელ გავჩუმდით, როდესაც "ქართული ოცნების" ცალკეულ წარმომადგენელთა მხრიდან ოპოზიციური ერთობის ან თუნდაც მინიმალური სოლიდარობისთვის ხელისშემშლელი განცხადებები კეთდებოდა. გავჩუმდით მაშინაც კი, როდესაც მორალს გვიკითხავდნენ ის ძალები, რომლებმაც 2011 წლის 26 მაისის მოვლენების შორიდან ყურება და საუკეთესო შემთხვევაში დუმილი არჩიეს. გავჩუმდით არა იმიტომ, რომ საპასუხო არგუმენტები არ გვქონდა, არამედ იმიტომ რომ მიგვაჩნია - ოპოზიცია უნდა ებრძოდეს არსებულ რეჟიმს და არა ერთმანეთს. მიუხედავად ყველაფრისა, "სახალხო კრებას" არც ერთი წუთით არ შეუწყვეტია რეალური ბრძოლა არსებული რეჟიმის შეცვლისა და სამშობლოს გადასარჩენად და ჩვენ ამ ბრძოლას ვაგრძელებთ", - ნათქვამია განცხადებაში.
