25-26 აპრილს, საქართველოს ოფიციალური ვიზიტით პოლონეთის უშიშროების საბჭოს ბიუროს დელეგაცია ეწვევა, რომელსაც ბიუროს ხელმძღვანელი სტანისლავ კოჟეი ხელმძღვანელობს. ვიზიტის ფარგლებში 26 აპრილს იგეგმება საქართველოს ეროვნული უშიშროების საბჭოსა და პოლონეთის ეროვნული უშიშროების ბიუროს შორის უსაფრთხოების სფეროში თანამშრომლობის გეგმის ხელმოწერა.
ხელმოსაწერი დოკუმენტი ითვალისწინებს საქართველოსა და პოლონეთის შესაბამისი უწყებების თანამშრომლობას ეროვნული უსაფრთხოების საკითხებზე ინფორმაციის გაცვლისა და გამოცდილების გაზიარების კუთხით, მონაწილეობას ერთობლივ ღონისძიებებში.
თანამშრომლობის გეგმის ხელმოწერის ცერემონიალი 13:30 საათზე, საქართველოს ეროვნული უშიშროების საბჭოს აპარატის ოფისში (ინგოროყვას 7, მე-7 სართული) გაიმართება. დელეგაციების შეხვედრის დასრულების შემდეგ გიგა ბოკერია და სტანისლავ კოჟეი პრესის წარმომადგენლებისთვის ერთობლივ ბრიფინგს გამართავენ.
პოლონეთის დელეგაცია საქართველოს ეროვნული უშიშროების საბჭოს მდივნის გიგა ბოკერიას ოფიციალური მოწვევით ეწვევა. ვიზიტის ფარგლებში ასევე იგეგმება პოლონეთის დელეგაციის შეხვედრა საქართველოს თავდაცვის მინისტრ ბაჩო ახალაიასთან და საგარეო საქმეთა მინისტრის პირველ მოადგილესთან ნიკოლოზ ვაშაკიძესთან.
