არასამთავრობო ორგანიზაცია ,,კონსტიტუციის 42-ე მუხლი" პრეზიდენტ მიხეილ სააკაშვილს საქართველოს მთავრობის მიერ 2011 წლის 27 დეკემბერს გამოცემული #489 დადგენილების გაუქმების მოთხოვნით მიმართავს, რომელიც «საქართველოს შინაგან საქმეთა სამინისტროს საჯარო სამართლის იურიდიული პირის «112»-ის მომსახურებს საფასურის, მისი განაკვეთისა და გადახდის წესის დამტკიცებას» ეხება.
#489 დადგენილების საფუძველზე 2012 წლის იანვრიდან მოქალაქეთა სააბონენტო ნომრების სადეპოზიტო ანგარიშებიდან 0.20 ლარის დაქვითვა დაიწყო, მიუხედავად იმისა, რომ მთავრობის #489 დადგენილების გამოცემის დღიდან არ უსარგებლიათ «112»-ს მომსახურებით. თანაც, დაქვითვა განხორციელდა იმ დროს როდესაც შს სამინისტროს საჯარო სამართლის იურიდიული პირი «112» ფაქტობრივად არ არსებობდა.
,,კონსტიტუციის 42-ე მუხლში" მიიჩნევენ, რომ სადავო ნორმატიული აქტით დადგენილი მოწესრიგება ეწინააღმდეგება მნიშვნელოვან კონსტიტუციურ პრინციპებს, კერძოდ, თანასწორობის ძირითად უფლებებს, რომლებიც აღიარებულია საქართველოს კონსტიტუციის მე-14 და 38-ე მუხლებით, ასევე, ევროპის ადამიანის უფლებათა და ძირითად თავისუფლებათა კონვენციის მე-12 დამატებითი ოქმით.
"მთავრობის დადგენილების სადავო პუნქტი არათანასწორ მდგომარეობაში აყენებს საქართველოს მოქალაქეებს, რადგანაც "112"-ს მომსახურების საფასურის გადახდა ეკისრებათ მხოლოდ იმ ადამიანებს, რომლებიც ფლობენ მობილურ ტელეფონებს და თვის განმავლობაში სატელეკომუნიკაციო მომსახურების შესაძენად ხარჯავენ 5 ლარზე მეტს, ასევე, ფიქსირებული სატელეფონო ნომრების მფლობელებს, რომლთა ტელეფონი თვის განმავლობაში ერთხელ მაინც იყო ორმხრივად ჩართული ან ისარგებლა ფასიანი მომსახურებით და ა.შ.", - აცხადებენ არასამთავრობო ორგანიზაციაში.
მათივე ინფორმაციით, კონსტიტუცია არ მოითხოვს ყოვლისმომცველ, ტოტალურ გათანაბრებას, ის მხოლოდ მოითხოვს, რომ ადამიანთა 2 ჯგუფს შორის დეფერენცირება შეესაბამებოდეს მათ შორის რეალურ განსხვავებას და არ უნდა იწვევდეს მნიშვნელოვნად თანასწორთა მიმართ არათანასწორ მოპყრობას.
"შესაბამისად, ადამიანთა 2 ჯგუფის დიფერენცირების ისეთი კრიტერიუმი, როგორიცაა ტელეფონით სარგებლობა და თვის განმავლობაში მობილური ოპერატორის მომსახურებაში დახარჯული თანხის ოდენობა, არაგონივრულია, რადგანაც ტელეფონით სარგებლობა არ ნიშნავს, რომ მობილურის მფლობელი უფრო მეტად საჭიროებს 112-ის დახმარებას, ვიდრე ადამიანი, რომელსაც არ აქვს ტელეფონი ან საუბრისას მომჭირნედ ხარჯავს თანხებს.
დისკრიმინაცია და არათანასწორი მოპყრობა უფრო ნათლად იკვეთება, როდესაც განვიხილავთ იმ პირთა მდგომარეობას, რომლებიც ფლობენ რამოდენიმე მობილურ სააბონენტო ნომერს. მაგ: პირი, რომელიც ფლობს 3 მობილურ ნომერს, თვის განმავლობაში მის მიერ "112" -სათვის გადახდილი თანხა სამჯერ აღემატება იმ პირის მიერ გადახდილ თანხას, რომელიც ფლობს მხოლოდ ერთ ნომერს, მიუხედავად იმისა აღემატებოდა თუ არა ჯამში სამივე ნომრიდან დახარჯული თანხა სხვა პირის მიერ ერთი ნომრიდან გახარჯულ თანხას და ეს არ ნიშნავს, რომ ის რაიმე უპირატესობით ისარგებლებს "112"-ის მომსახურებისას ან უკეთ იქნება დაცული", - აცხადებენ "კონსტიტუციის 42-ე მუხლში".
ცნობისათვის, აღნიშნული დადგენილების გაუქმების მოთხოვნით ,,კონსტიტუციის 42-ე მუხლმა" თბილისის საქალაქო სასამართლოს ადმინისტრაციულ საქმეთა კოლეგიასაც მიმართა.
