საქართველოს პარლამენტის თავმჯდომარე დავით ბაქრაძე ისრაელში ვიზიტის დროს, ჯვრის მონასტრის საკითხის დაყენებას კიდევ ერთხელ ადასტურებს. ამის შესახებ დავით ბაქრაძემ ჟურნალისტებთან ისრაელის ერთ-ერთი რუსულენოვანი მედიასაშუალების მიერ გავრცელებული ინფორმაციების შესახებ განაცხადა, რომლის თანახმადაც, ქართული მედიასაშუალებები აღნიშნულ საკითხზე ცრუ ინფორმაციებს ავრცელებდნენ.
ბაქრაძის განცხადებით, ისრაელში ერთი რუსულენოვანი საიტი სწორედ ასეთი ტიპის ინფორმაციების გავრცელებით არის დაკავებული და საქართველოს მიმართ პროვოკაციული ინფორმაციების გავრცელების წარმატებული პრაქტიკა აქვს.
"შემიძლია, პირადად დაგიდასტუროთ, რომ ჩემი ვიზიტის დროს ჯვრის მონასტრის საკითხი ყველა დონეზე დავაყენე. ამ საკითხზე საუბარი ქნესეთის თავმჯდომარესთან და პრემიერთან მქონდა. საკითხი დეტალურად განვიხილეთ ასევე რელიგიის საახელმწიფო მინისტრთან და პარლამენტის წევრებთან, ასევე მეგობრობის ჯგუფის წარმომადგენლებთან. გარდა ამისა, ამის შესახებ ვისაუბრეთ საგარეო საქმეთა სამინსტროში, მთავარი შეხვედრა კი იერუსალიმის პატრიარქთან გვქონდა. სხვათაშორის, არ მინახავს ბოლო პერიოდში არც ერთი კომენტარი, რომ ისრაელი ამ შეხვედრებს უარყოფდეს", - აღნიშნა პარლამენტის თავმჯდომარემ.
მისივე თქმით, ჯვრის მონასტრის საქართველოსთვის დაბრუნების თაობაზე მოლაპარაკებები დაწყებულია, თუმცა უცნობია, როდის დასრულდება, რადგან ეს ადვილი და ხანმოკლე პროცესი არ იქნება.
,,არ ვაპირებთ ამ საკითხზე საუბარს იერუსალიმის საპატრიარქოს გვერდის ავლით. იერუსალიმის საპატრიარქოს ჩვენს მთავარ პარტნიორად განვიხილავთ. რთულია, ვილაპარაკოთ იმაზე, როდის დადგება შედეგი. შემიძლია, დავადასტურო, რომ მოლაპარაკებები დაწყებულია და იმედი მაქვს, რომ ისინი პოზიტიური შედეგით დასრულდება,, - დასძინა დავით ბაქრაძემ.
საქართველოს პარლამენტის თავმჯდომარე იერუსალიმში გასულ კვირას იმყოფებოდა.